VLEN dhe BDI me propozime të ndryshme – Njëra palë ofron veting, tjetra ndryshime kushtetuese kundër korrupsionit

Në vend të vetingut ndërkombëtar që e paralajmëroi BDI, koalicioni VLEN do të luftojë me politikanët e korruptuar përmes amendamenteve kushtetuese. Nga VLEN kërkuan mbështetje nga të gjithë partitë që të ndryshohet Kushtetuta. Njëra prej synimeve është që të bëhet revizion i të gjithë procedurave gjyqësore për ish funksionarë dhe funksionarë aktual të cilat janë ndërprerë për shkak të vjetërsimit të përgjegjësisë eventuale penale. I bënë thirrje BDI-së që të mbështes propozimin e tyre që t’i vihet fund korrupsionit politik.

“Ja propozimi i VLEN-it: Ligjet mund të kenë fuqi retroaktive edhe në rastet që lidhen me vjetërsimin e përgjegjësisë penale për abuzimet e kryera nga funksionarët e zgjedhur dhe të emëruar gjatë ushtrimit të detyrave publike, ku janë shkaktuar dëme në fondet publike dhe mjetet buxhetore në nivel qendror dhe lokal, dhe ku me ato abuzime është përfituar pasuri e paligjshme”, tha Fari Iseni, VLEN.

Nga VLEN paralajmëruan diskutim të gjerë për idenë për amendamente të tilla kushtetuese dhe nuk treguan nëse tashmë kanë siguruar mbështetjen e VMRO-DPMNE-së. Sa i përket idesë për veting ndërkombëtarë, VLEN e vlerësoi propozimin e BDI-së si “ngritje të pluhurit në sy të opinionit”. Nga BDI kërkojnë mbështetje që t’i vendoset fundi, siç thonë, drejtësisë selektive sipas porosive partiake.

“Për të gjitha dështimet dhe mosbesimin, është koha që të vendoset një veting të monitoruar ndërkombëtarisht për të gjithë politikanët, gjyqtarët, prokurorët, oligarkët, por edhe për privatizimin dhe tranzicionin në të 32 vitet e pavarësisë. U bëjmë thirrje partive politike të kapërcejnë veten, të ndalojnë gjuetinë e shtrigave dhe mashtrimin e publikut për defokus politik dhe së bashku të miratojmë ligjin për një verifikim të monitoruar ndërkombëtarisht të të gjitha akuzave që nga pavarësia e deri më sot”, tha BDI.

Nga VMRO-DPMNE paraprakisht informuan se e hedhin poshtë propozimin e BDI-së. Nga LSDM paralajmëruan se ende nuk kanë qëndrim për idenë e vetingut ndërkombëtarë. Tani për tani as VMRO-DPMNE, as LSDM nuk reaguan për idenë e VLEN-it për luftë kundër korrupsionit të lartë përmes amendamenteve kushtetuese.