U.D. presidente e Kosovës Vjosa Osmani, mbrëmë në emisionin Click Plus tha se e ka përcjell me vëmendje bllokimin e Bullgarisë ndaj Maqedonisë së Veriut në rrugën drejt BE-së. Ajo tha se është shumë i dëmshëm precedenti që Bullgaria po i vendos veto Maqedonisë së Veriut.
“Vlerësimi im edhe nga fakti që e kam përcjell procesin e integrimit të Ballkanit perëndimorë që një kohë të gjatë, është që nuk do të duhej të kishim raste të tilla, kur temat janë të natyrës historike dhe vlerësimeve të historisë ta bllokojnë ecjen përpara të një shteti drejt Bashkimit Evropian. Sepse kur bëhet vlerësimi i reformave bëhet vlerësimi i kryerjes apo përmbushjes së atyre reformave në momentin e tanishëm”, tha u.d Presidente e Kosovës, Vjosa Osmani në Click Plus në TV21.
Më tej Osmani tha se qytetarët e Maqedonisë nuk e meritojnë një dënim të tillë që po u bëhet.
“Mirëpo të thuhet që çështje të identitetit duhet të bëhet pjesë në përmjet të cilave dikujt i vendoset vetoja për anëtarësim drejt Bashkimit Evropian, përkundër reformave që mund të ndërmerren mendoj që është një gabim i madh, që i dëmton qytetarët e Maqedonisë së Veriut të cilët nuk e meritojnë atë dëme që po bëhet”, u shpreh Vjosa Osmani – u.d Presidente e Kosovës.
Vjosa Osmani e mori detyrën e presidencës së Kosovës prej ditës kur Gjykata Speciale konfirmoi aktakuzën ndaj ish presidentit Hashim Thaçi. Ajo njëherit është edhe kryetare e Kuvendit të Kosovës.