Viti shkollor nis më 1 shtator, Ademi: Në Qeveri duan që nxënësit të rikthehen në shkollë

Mësimi online nuk është efikas. Vetëm 4 për qind e prindërve nga rreth 10 mijë të anketuarit nga organizata joqeveritare “Reaktor” – hulumtim në aksion, e kanë cilësuar mësimin online si efikas. As të mirë as të keqe përvojën me mësimin online e kanë cilësuar drejtorët dhe mësimdhënësit e shkollave fillore dhe të mesme.

Por, kur janë pyetur se si duhet të realizohet mësimi nga 1 shtatori, gjysma e tyre kanë ndarë qëndrimin se ai duhet të zhvillohet në shkolla.

“Rreth gjysma e të anketuarve, drejtorët, prindërit dhe arsimtarët janë përgjigjur se duan mësimi nga shtatori të mbahet në shkolla në bazë të protokolleve të miratuara. Më shumë se gjysma te drejtorët dhe arsimtarët, ndërkaq 46 për qind është te prindërit. Rreth një e treta apo  36% te drejtorët dhe arsimtarit dhe 35% te prindërit konsiderojnë se mësimi mund të vazhdohet me model të kombinuar i cili orarin mund ta ketë me ditë apo me klasa”, tha Marija Bashevska nga “Reaktor”.

Këto rezultate nga izolimi shtëpiak, për shkak të infektimit nga Kovid-19 i dëgjoi edhe ministri i Arsimit dhe Shkencës, Arbër Ademi. Edhe ai ndan mendimin se mësimi online nuk ishte perfekt.

Duke e bazuar në hulumtimi i “Reaktor” tregoi se si ai dhe anëtarët e Shtabit Qendror të Krizës ndajnë mendimin se nxënësit duhet të rikthehen në shkollë.

“Mendoj se nuk duhet të prejudikojmë, por mbizotëron mëndim pozitiv në Shtabin e Krizës por dhe në Qeveri dhe mes kolegëve që të fillojë procesi arsimor me prani fizike. Po, kjo është e saktë se mbizotëron mendim, por po shqyrtohen të gjitha modelet”, tha ministri i Arsimit dhe Shkencës, Arbër Ademi.

Ajo çfarë sipas tij është e sigurt tani për tani, është se viti shkollor do të fillojë nga 1 shtatori dhe se vendimet do të sillen në kohë.

“Ne përgatitemi që viti shkollor të fillojë nga 1 shtatori. Se a kemi kohë të mjaftueshme, sigurisht se kemi. Kemi kohë para nesh që të fillojë viti shkollor me kohë dhe draft protokollet njëherë janë shqyrtuar nga ana e Komisioni për sëmundje ngjitëse, u është dhënë dritë e gjelbër. Këtë të mërkurë ne kemi diskutuar këto modalitete në Shtabin e Krizës për realizimin e procesit arsimor”, deklaroi më tej Ademi.

Si ministri Ademi edhe drejtorët e shkollave të anketuar nga “Reaktor” kanë vlerësuar se kanë kushte për të mbajtur higjiena dhe ruhet distanca fizike mes nxënësve. Në shkollat ku ka më shumë nxënës, Ademi vlerësoi se mësimi aty mund të zhvillohet edhe me katër ndërrime.