U mbushën 3 vjet nga zgjedhjet lokale. Po çfarë bëri e çfarë jo kryetari i Çairit, Visar Ganiu, në këto 36 muaj në krye të komunës? Ai vlerëson se arsimi në komunë është bërë me kushte më të mira për punë.
“Kemi përmirësuar kushtet dhe cilësitë në aspektin e objekteve shkollore, ku 3 shkolla fillore totalisht i kemi rikonstruuar”, tha Visar Ganiu – Kryetar i Komunës Çair.
Bashkëbisedues Ganiu kishte kundër kandidatin e lokaleve të 2017-tës, Zekirija Ibrahimin.
“Në Çair fatkeqësisht nuk ka ndryshuar asgjë pos që janë rritur katet ndërtesave pa leje dhe aq më tepër është rritur edhe xhepat e funksionarëve të komunës dhe shkalla e lartë e korrupsionit”, u shpreh Zekirija Ibrahimi – ish-kandidat për kryetar të Komunsë së Çairit.
Ganiu me kundërpërgjigje, “Inspektorati i ndërtimtarisë që udhëhiqet nga kuadër i Alternativës asnjëherë nuk është ankuar!”
“Ai inspektorat ka të drejta të përzihet edhe në Çair, por pyeteni a ka ndonjë ankesë ndonjëherë”, theksoi kryetari i Komunës së Çairit, Visar Ganiu.
Akuza pati edhe për “Kontratën” që Ganiu e lidhi me qytetarët në 2017-tën, të cilën Ibrahimi e quajti mashtrim, ndërsa kryetari pohon se po realizohet dhe ende po punohet.
“Është edhe një e vërtetë që e kam sjellë këtu, ku 70% e “Kontratës”, me projekte që janë realizuar”, potencoi Visar Ganiu – Kryetar i Komunës së Çairit.
Por cilat janë 3 projektet me të cilat krenohet Ganiu?
“Një është stadiumi, me vlerë 1 milion e 300 mijë euro, plus 100 mijë rekonstruimi i barit dhe ujitjes. Gjithashtu është palestra sportive te shkolla fillore “Kongresi i Manastirit”, gjithashtu edhe kalldrëmi në Çarshi”, deklaroi Visar Ganiu – Kryetar i Komunës së Çairit.
E Ibrahimi ia përmendi ato që janë premtuar në “Kontratë”, e s’janë realizuar!
“Katër garazhe në kate, a janë bërë?! Jo! Po flasim për fakte. Efikasiteti energjetik në komunën e Çairit. A është bërë?! Nuk është bërë! Të parëndësishme janë shpjegimet, nuk është bërë! Qendër rinore në lagjen Seravë, nuk është bërë!”, tha ish-kandidati për kryetar Komune në Çair, Zekirija Ibrahimi.
Ganiu tha se parkingu tek tregu i gjelbër është në përfundim e sipër, ndërsa tek “Isa Beu” pritet që procedura në qeveri të kalojë brenda javës. Ai thotë se për këto punë ka pasur pengesa nga qyteti i Shkupit.
“Për ta dhënë Visar Ganiu lejen për parkim në kate duhet të kalojë plani detal, kjo duhet të kalojë në qytet të Shkupit, po në Ministri, e sërish në qytet të Shkupit, e kthehet tek ne, dhe çdo herë kemi pasur pengesa atje, që nuk ndodh në të gjitha komunat, por ndodh tek komuna jonë”, tha Visar Ganiu – Kryetar i Komunës së Çairit.
Sa i përket infrastrukturës, Ibrahimi akuzoi Ganiun se mburret me asfaltin që shtron kryetari i Shkupit, por Kryetari i Çairit tha se Qyteti investimet kapitale i ka obligim, sepse merr taksa edhe nga Çairi.