Kryeministri i Kosovës, Albin Kurti ka publikuar një video ku pretendohet se forcat e armatosura serbe janë afër kufirit të Kosovës, përcjell TV21.
Kurti kujton deklaratën e presidentit serb, Aleksandar Vuçiqit ku publikisht kërcënoi Kosovën.
“Ditë më parë, Presidenti i Serbisë, Aleksandar Vuçiq, kërcënoi publikisht Kosovën, duke thënë se “Serbia do të presë momentin më të mirë të mundshëm dhe do ta shfrytëzoj mundësinë për të vepruar”, thotë Kurti.
Ndërkaq bëri të ditur se njësitet ushtarake janë parë gjatë ditës së sotme dhe siguron qytetarët se me kujdes të shtuar janë duke e vëzhguar situatën.
“Sot gjatë ditës, njësi të specializuara të ushtrisë së Serbisë janë vërejtur vetëm disa metra larg kufirit me Kosovën, në afërsi të fshatit Banje të Zubin Potokut. Lëvizje të ngjashme janë regjistruar edhe në fshatin Oslare të Bujanovcit, në afërsi të kufirit me Kosovën.
Jemi të vetëdijshëm se Forcat e Armatosura të Serbisë janë duke realizuar stërvitjet e rregullta dhe ato janë duke i përdorur si pretekst për të shkaktuar provokime të qëllimshme në afërsi të kufirit me Kosovën.
Jemi duke vëzhguar me kujdes se a do të përpiqen ta kalojnë kufirin, gjersa edhe ky afrim i automjeteve të tyre ushtarake nuk është normal”, tha Kurti.