LSDM dega Gostivar kërkoi përgjegjësi politike dhe penale për helmimin e mbi 3.000 qytetarëve nga uji i ndotur, duke akuzuar institucionet dhe qeverinë për dështim në menaxhimin e situatës. Sipas Bojan Zafirovskit, autoritetet kanë heshtur dhe nuk kanë reaguar me kohë, ndërsa kërkohet që të gjithë përgjegjësit, në nivel lokal dhe qendror, të japin llogari.
“Ndërsa qytetarët e Gostivarit pinë ujë të helmuar për ditë të tëra, Qendra e Shëndetit Publik e shpalli ujin të sigurt. Dhe para kësaj, ata heshtën për 5 ditë. 200 persona u paraqitën në spitalin e Gostivarit dhe asnjë nga autoritetet shëndetësore nuk bëri asgjë. Tani po dërgojnë Ministrin e Policisë për të na treguar për proceset e klorinimit të ujit, Ministrin e Shëndetësisë për të sulmuar mjekët që folën për të vërtetën në Gostivar”, tha Bojan Zafirovski, LSDM, Dega Gostivar.
Deputeti Brane Petrushevski akuzoi LSDM-në, BDI-në dhe Arben Taravarin se po mbrojnë kryetarin e Komunës së Gostivarit, Valbon Limanin, lidhur me skandalin e ujit, në vend që të mbrojnë interesin e qytetarëve. Ai tha se opozita po përhap gënjeshtra dhe panik me raportime të vjetra, ndërsa kërkoi që Limani të marrë përgjegjësi dhe të japë dorëheqje.
“Tani, në kontekstin e skandalit të Gostivarit, ata përsëri po thonë vetëm gënjeshtra si ajo e fundit se uji në fshatin Slivnik të Velesit është me defekt. Dhe imagjinoni, ata po paraqesin një raport të vjetër. Ne i këshillojmë me mirësi të bëhen të vetëdijshëm dhe të ndalojnë së përhapuri gënjeshtra dhe panik dhe të shikojnë veten”, deklaroi Brane Petrushevski, deputet i VMRO-DPMNE-së.
Ditë më parë kryetari i Gostivarit, Valbon Limani, që vjen nga ASH-ja e Taravarit, kërkoi që rasti në të mos keqpërdoret për tema politike, ndërsa ka theksuar se prioritet i tij mbetet shëndeti i qytetarëve dhe që gostivarasit sa më shpejtë të kenë ujë të pijshëm.