Bisedimet mes Shtetet e Bashkuara të Amerikës dhe Iran kanë sjellë “përparim të konsiderueshëm”, megjithëse nuk është arritur një marrëveshje përfundimtare, deklaroi zëvendëspresidenti amerikan JD Vance.
Vance, në një deklaratë për televizionin amerikan Fox News, tha se nuk mund të thuhet se negociatat kanë shkuar keq. “Përkundrazi, pati edhe momente pozitive. Kemi arritur përparim të madh”, u shpreh ai, duke shtuar se pala iraniane ka bërë disa lëshime, por të pamjaftueshme.
Negociatat e zhvilluara gjatë fundjavës në Islamabad zgjatën rreth 21 orë, si një përpjekje për të arritur një marrëveshje për përfundimin e konfliktit në Lindjen e Mesme.
Vance nuk specifikoi se kur mund të vazhdojnë bisedimet, duke theksuar se “topi është në anën e Iranit”. Ai nënvizoi se kontrolli mbi uraniumin e pasuruar të Iranit dhe vendosja e një mekanizmi verifikimi për të parandaluar zhvillimin e armëve bërthamore janë “vijat e kuqe” kryesore për Uashingtonin.
Sipas tij, bisedimet përfunduan pa marrëveshje sepse negociatorët iranianë nuk arritën një kompromis përfundimtar, por njëkohësisht ofruan një pasqyrë më të qartë se kush merr vendimet kyçe në Teheran.
Nga Pakistan njoftuan se do të vazhdojnë të luajnë rolin e ndërmjetësit në dialogun mes dy palëve. Kryeministri Shehbaz Sharif deklaroi se po punohet për tejkalimin e dallimeve për “disa çështje”.
Pakistani në periudhën e fundit është pozicionuar si një ndërmjetës kyç mes Teheranit dhe Uashingtonit, duke pasur rol të rëndësishëm edhe në arritjen e armëpushimit dyjavor të shpallur javën e kaluar.