Vaksinimi anti-Covid filloi edhe në vendin tonë! “Qëllimi arrihet nëse vaksinohemi të gjithë”

Vaksinimi anti-covid filloi edhe në vendin tonë.

Qytetarët mbi 65 vjeç sot u drejtuan në punktet e vaksinimit.

Ata që u vaksinuan dhe ata që po prisnin të merrnin dozën e vaksinës, dhanë mesazhe pozitive.

Njëri prej qytetarëve tha se qëllimi arrihet vetëm nëse vaksinohemi të gjithë.

 “Do të vaksinohemi. Po mendoj se duhet të gjithë të vaksinohen, nëse njëri vaksinohet të tjerët kjo, nuk arrihet qëllimi”, tha një qytetar.

 “Mesazhi im është të vaksinohen të gjithë për tu mbrojtur”, shtoi një tjetër qytetar.

A u vaksinuat?

“Po”.

Si po ndjeheni?

“Shumë mirë. Tani për tani nuk kam asnjë problem”.

Çfarë porosie dërgoni tek të tjerët?

“Po kjo është një sëmundje masive dhe duhet të vaksinohen të gjithë”.

Në pikën e vaksinimit në “Jane Sandanski” sot shkoi edhe ministri i Shëndetësisë Venko Filipçe.

Ai theksoi se deri më tani, nga ata që janë thirrur për t’u vaksinuar, asnjë nuk ka refuzuar dhe se të gjithë janë paraqitur në orar dhe në vendin e caktuar. Ai apeloj edhe njëherë se nuk ka nevojë për panik por vetëm kujdes.

 “Vaksinim masiv duhet të ketë, për atë se kjo është një element kyç që ne po luftojmë me pandeminë. Gjithashtu do t’i ndjekim edhe rekomandimet që se a duhet ndonjë prej grup moshave të jetë më i kujdesshëm, apo duhet eventualisht që të konsultohet me mjekun para se të merret vaksina”, deklaroi Venko Filipçe – Ministër i Shëndetësisë.

Ministri gjithashtu theksoi se në vendin tonë është regjistruar edhe rasti i parë me efekte të padëshirueshme nga AstraZeneca. Behet fjalë për një 28-vjeçare e cila është vaksinuar në Serbi. Efektet janë paraqitur 6 ditë pas vaksinimit.

Gjithashtu gjatë ditës së sotme ministri tha se do të ketë takim edhe me komisionin për sëmundje infektive, ndërsa shtoi se nuk mendon se duhet të ketë masa të tjera restriktive.