“Ne e dimë se si jemi, e kush jemi. Të mos mbetet ajo më e keqja që të ketë urrejtje. Normalisht duhet të ketë edhe prej jush reagime, që është e vërtetë. Kjo është shtypur, është botuar dhe ndoshta në të ardhmen sigurisht do të bëhet që kjo të evitohet dhe të largohet ky libër prej përdorimi”.
Profesori i gjeografisë në gjimnazin “Zef Lush Marku” të Shkupit, Burim Aliu, këto fjalë është i detyruar të ia përsërisë çdo gjenerate. Ajo që shkruhet në librin e vitit të dytë, për të është e papranueshme për të dhe nxënësit e tij.
Kjo sepse ku flitet për strukturën e popullsisë, shkruhet se “prej shqiptarëve të Maqedonisë ekzistojnë fise që e llogarisin veten autokton por që kryesisht janë popullsi maqedone që gjatë sundimit turk e ka pranuar islamin dhe është shqiptarizuar, e midis tyre ka ndonjë fis me prejardhje turke, rome e çerkeze”.
Profesori Aliu di si të veprojë kur vjen në këtë pikë të leksionit, thjesht e kalon, por e shqetëson mendimi për nxitjen dhe paragjykimet që mund të krijohen tek shkollat ku ligjërohet maqedonisht.
Burim Aliu: “Gjimnazi ynë dhe shkollat e tjera shqipe, sigurisht edhe nuk mësohet por më e keqja është, që do ta them haptas, çfarë të themi për gjimnazet, shkollat e mesme maqedonase. Normalisht paraqitet dhe ende ekziston ajo urrejtje që është në përgjithësi”.
Ky libër është botim i vitit 2009, por është miratuar nga Ministria e Arsimit që në vitin 2002. Në 20 vite askush nuk e korrigjoi, andaj Forumi Rinor i Aleancës për Shqiptarët dhe Alternativës, faqet me përmbajtje, siç i quajtën fashiste, i grisën dhe i dogjën mu përballë Ministrisë së Arsimit.
“Ne duhet ta bëjmë atë që duhet ta bëjë secili nxënës, prind e arsimtar me koshiencë atdhetare e patriotike që mos të lejojë që këto elemente të turpshme të jenë pjesë e librave e librave tonë shkollor me të cilat indoktrinohen njerëzit dhe ndoshta dëmtohen shqiptarët. Kështu duhet të përfundojë fashizmi”, tha Omer Ajdini – Forumi rinor ASH-AAA.
Po pse në 2 dekada, askush nuk mori kurajon të përmirësojë tekstet fyese për shqiptarët? Ndër vite me Ministrinë e Arsimin kanë drejtuar kuadro të Bashkimi Demokratik për Integrim. I fundit me mandat dyvjeçar ishte Arbër Ademi. Gjatë kohës sa ishte në kabinet, thotë se arriti të korrigjojë 51 tekste shkollore, por shton se fatkeqësisht nuk u ndryshuan të gjitha sepse pritej që kur të ndryshoheshin, të futeshin edhe faktet e reja historike, siç është ndryshimi i emrit të shtetit.
“Momentumin që ka të bëjë me vitin 2019, pas nënshkrimit të Marrëveshjes së Prespës dhe arritjes së Marrëveshjes me Bullgarinë ne dërguam të gjitha tekstet shkollore dhe programet mësimore në komisionet respektive ndërshtetërore, si me Greqinë ashtu dhe Bullgarinë, dhe prisnim aso kohe një produkt final që edhe në aspektin internal që çështjet e kontestueshme t’i korrigjojmë”, deklaroi Arbër Ademi – ish-ministër i Arsimit dhe Shkencës.
Gabimet në librin e gjeografisë e faktet e tjera Ademi i quan broçkulla, ndërsa pohon se reformat e nisura duhet të vazhdojnë. Të pyetur për këto gabime në tekste shkollore, nga Ministria e Arsimit për TV21 thanë se me planin për reformim të tërësishëm të sistemit arsimor do të mënjanohen edhe lëshimet të cilat ndër vite qëndrojnë nëpër libra.
Si dhuratë i lanë ministres së Arsimit një libër për fiset shqiptare, por kjo solli keqkuptim mes të rinjve dhe sigurimit, ku kjo e fundit lajmëroi policinë, e cila erdhi për të evidentuar rastin.