Kombëtarja e Argjentinës do të zbresë në fushë me fanellën e saj të kaltër të errët në gjysmëfinalen e Kupës së Botës kundër Anglisë, një zgjedhje që për shumë tifozë lidhet me disa nga momentet më të paharrueshme në historinë e futbollit argjentinas.
Fanella e kaltër është bërë më shumë sesa një alternativë ndaj fanellës tradicionale bardhekaltër. Ajo konsiderohet pjesë e folklorit futbollistik të Argjentinës dhe lidhet me kujtime të mëdha të Kupës së Botës.
Kampionët në fuqi do ta veshin këtë fanellë edhe në përballjen e së mërkurës ndaj Anglisë në Atlanta.
Argjentina kishte veshur fanellën e kaltër edhe në çerekfinalen e Kupës së Botës 1986 në Meksikë kundër Anglisë, kur Diego Maradona realizoi golin e famshëm “Dora e Zotit” dhe më pas shënoi edhe golin spektakolar të njohur si “Goli i Shekullit”, në fitoren 2-1.
Po ashtu, në Kupën e Botës 1998 në Francë, Argjentina ishte me fanellën e kaltër kur eliminoi Anglinë pas penalltive në fazën e 1/8 së finales, pas barazimit dramatik 2-2.
Trajneri i Anglisë, Thomas Tuchel, tha se e kupton zgjedhjen e kundërshtarit.
“Edhe unë do ta kisha bërë të njëjtën gjë nëse do të kishte ndonjë besëtytni të lidhur me të. Prandaj, u jap meritë atyre. Nuk isha në dijeni të kësaj”, deklaroi Tuchel.
Tekniku gjerman pranoi se edhe në nivelin më të lartë të sportit profesionist, besëtytnitë vazhdojnë të kenë ndikim.
“Unë kam rutinat e mia supersticioze. Nuk do t’ju tregoj, sepse një tjetër besëtytni është se nëse i tregoj, ato nuk do të funksionojnë”, tha ai.
Në anën tjetër, përzgjedhësi i Argjentinës, Lionel Scaloni, minimizoi spekulimet se vendimi ishte marrë për arsye supersticioze.
“Epo, unë nuk kërkova fanellën e kaltër. Nuk e di kush e bëri këtë, por ndoshta është traditë. Vërtet nuk e di. Nuk mund të flas për këtë. Dhe nëse Thomas nuk kishte problem me këtë, atëherë mund të thoni të njëjtën gjë edhe për mua”, tha Scaloni.
Fanella e kaltër e Argjentinës është frymëzuar nga kultura e vendit dhe përmban motive të stilit fileteado, një formë dekorative arti nga Buenos Aires, e njohur nga UNESCO.