Presidenti amerikan, Donald Trump, mirëpriti udhëheqësit e Azisë Qendrore në një samit dhe darkë në Shtëpinë e Bardhë, duke nënshkruar një seri marrëveshjesh tregtare, diplomatike dhe minerare për të forcuar ndikimin e SHBA-së në rajon. Ai u shoqërua nga sekretari i Shtetit Marco Rubio dhe nënpresidenti JD Vance.
Trump tha se qëllimi i tij është të bëjë raportin e SHBA-së me Azinë Qendrore “më të fortë se kurrë më parë”, ndërsa presidentët e Kazakistanit, Kirgizisë, Taxhikistanit, Turkmenistanit dhe Uzbekistanit e përshkruan këtë si një “epokë të re të bashkëpunimit”.
Një nga marrëveshjet kryesore është zhvillimi i njërës nga rezervat më të mëdha të tungstenit në Kazakistan. Kompania amerikane Cove Kaz Capital Group do të ketë 70% të aksioneve, në partneritet me kompaninë shtetërore minerare të Kazakistanit. Projekti vlerësohet në 1.1 miliard dollarë, ndërsa Banka Amerikane Eksport-Import do të financojë 900 milionë dollarë.
Gjithashtu, gjatë samitit janë nënshkruar marrëveshje për shitjen e deri 37 aeroplanëve Boeing për linjat kombëtare të Kazakistanit, Taxhikistanit dhe Uzbekistanit. Kazakistani njoftoi se pritet t’i bashkohet Marrëveshjeve të Abrahamit, kornizës së udhëhequr nga SHBA për bashkëpunim mes Izraelit dhe shteteve arabe dhe myslimane.
Zyrtarët amerikanë thanë se samiti ka për qëllim të sinjalizojë një angazhim më të qëndrueshëm të SHBA-së në Azinë Qendrore, një rajon strategjik që synon të balancojë marrëdhëniet me Kinën dhe Rusinë.
Pini Althaus, drejtori ekzekutiv i Cove Kaz Capital Group, e përshkroi marrëveshjen për tungstenin si “një fitore të madhe për SHBA-në dhe nevojat e saj për minerale kritike”, duke shtuar se negociatat synojnë të parandalojnë zhvillimin e rezervave strategjike nga kompanitë kineze.
Ky samit shënon një hap tjetër të SHBA-së në konkurrencën globale për minerale të rralla të tokës, të cilat janë të nevojshme për teknologjitë e gjelbra, elektroniken dhe industrinë ushtarake.