Presidenti amerikan Donald Trump ka paralajmëruar se Shtetet e Bashkuara mund të vendosin tarifa ndaj vendeve që kundërshtojnë planet e tij për Groenlandën. Deklarata u bë gjatë një takimi në Shtëpinë e Bardhë, ku Trump e cilësoi ishullin si jetik për sigurinë kombëtare të SHBA-së.
Groenlanda është territor vetëqeverisës nën sovranitetin e Danimarkës, e cila së bashku me autoritetet lokale dhe disa vende të tjera ka kundërshtuar hapur idenë e aneksimit. Trump nuk specifikoi se cilat shtete mund të preken nga tarifat apo mbi çfarë baze ligjore do të vendoseshin ato.
Në kohën e këtyre deklaratave, një delegacion dypartiak i Kongresit amerikan po qëndronte për vizitë në Groenlandë, me qëllim mbështetjen e territorit dhe uljen e tensioneve. Delegacioni u takua me përfaqësues lokalë, si dhe me kryeministren daneze Mette Frederiksen dhe homologun e saj groenlandez.
Trump ka përsëritur se SHBA duhet ta “zotërojë” Groenlandën për ta mbrojtur nga kërcënimet e mundshme ruse apo kineze, duke mos përjashtuar as përdorimin e forcës. Këto deklarata kanë shkaktuar shqetësim serioz në Evropë.
Danimarka ka paralajmëruar se çdo veprim ushtarak do të rrezikonte themelet e NATO-s, ndërsa aleatët evropianë janë rreshtuar në mbështetje të saj. Disa vende evropiane tashmë kanë dërguar trupa në Groenlandë në kuadër të një misioni zbulues, duke theksuar se siguria e Arktikut është përgjegjësi e përbashkët.
Groenlanda, ndonëse pak e populluar, ka rëndësi të madhe strategjike për shkak të pasurive natyrore dhe pozicionit gjeografik në Arktik, ku SHBA tashmë mban një bazë ushtarake aktive.