Tri ditë nuk kanë mbyllur sytë, familja Zeneli frikohet se çatia do të shembet

Kështu pikon shiu brenda në shtëpinë e Familjes Zeneli në Duqanxhik të Komunës së Çairit. Katër muret mbajnë në këmbë çatinë e cila është gjysmë e shembur. Tre netë me radhë nuk mund të bëjnë gjumë pasi uji ka depërtuar dhe ka lagur të gjitha gjësendet. Kanë frikë se mund të marrë flakë shtëpia pasi kanë kabllo të lagura nga shiu. Mbi çati kanë vendosur qese që sadopak të mbrohen nga moti i ligë.

“Edhe atë tepihun e kam të lagur. Sungjerin djalit mbrëmë ia shtrova, qe si është bërë i lagur. Çfarë fotografi është kjo? Më tha djali mami po më dhemb shpina, këmbët. Ai flen këtu, s’kam çfarë të bëj. Virtinat po më prishen nga shiu, po kalben. Shiu kur bje po pikon dhe direkt në shteker. Këtu përmbi maqinë pikon”, tha Sabire Zeneli.

Sabirja është nënë e 3 fëmijëve, vajza e saj është e martuar, ndërsa dy djemtë e saj punojnë por paratë nuk u dalin as për t’i blerë ilaçet. Njëri prej tyre është Arijani i cili punon si sigurim dhe merr rrogë prej 13 mije denarëve. Nuk marrin asnjë ndihmë shtetërore.

 “Këtu ku flej po pikon, në këtë pjesë dje shumë pikonte, deri te kjo drita. Edhe sungjeri më është lagur. Tepikat krejt ujë. Nëse ka mundësi me na ndihmu dikush, ishallah Zoti e shpërbleftë”, tha Arijan Zeneli.

Sabirja banjon e shyrtëzon edhe për t’i larë enët. Muri ka marrë ngjyrën e zezë nga myku.

 “Jo që unë dua por jam e detyruar të jetoj kështu. Më vjen shumë keq. Këtu është e çarë dhe e krisur. Është e mykur se shiu po hyn edhe këtu. I gjithë muri është uj”, tha nëna Sabire.

Përveç skamjes edhe nëna Sabire ankohet prej disa sëmundjeve që kërkojnë terapi e ajo nuk ka para. Duhet të bëjë operacion në tru pasi që është diagnostikuar me kancer në tru.

“Këtu i vendosi teshat nuk është turp se nuk kam ku ti vendosi nuk kam raft. Kush mundet le të na ndihmojë. Më kishte ardhë mirë nëse dikush na del në krah. Kur e shoh kështu gjendjen po sëmurem edhe më shumë. Pi disa hapa që të qetsohem se dridhem, sëmurem më keq”, tha Sabirja.

Njerëzit human i kanë sjell miell dhe ushqim nuk ka ku ta ruaj për shkak të mykut të madh. Nëna Sabire për festën e fundit të Bajramit I kanë dhënë mish kurbani të cilin do ta përgatisë për darkë.

“I kam lënë mushkritë të shkrihen, thash t’i përgatis që të hanë fëmijët. Ata më thonë mami duhesh të hash, unë ju them mos më shikoni mua, hani ju, ata më thonë nëse ti nuk ha as ne nuk do të hamë”, tha nëna Sabire.  

U larguam nga familja Zeneli, me shpresë për një ndihmë ndaj tyre nga njerëzit të cilët do të solidarizohen me ta duke ju mundësuar që edhe ata të bëjnë një sy gjumë të rehatshëm.

Kontakt: Sabire Zeneli 00389 070 748 201