Shkaku i aksidentit të autobusit në të cilën humbën jetën 10 kosovar, si duket ka qenë shoferi për të cilin dyshohet se e ka zënë gjumi. Ai është arrestuar në vendin e ngjarjes dhe po ndërmerren veprime të tjera provuese për fillimin e procedimit penal. Sipas zëvendësprokurorit komunal Slavko Pranjiq vet shoferi ka thënë se e ka zënë gjumi.
Gazetari: A janë të vërteta pohimet se shoferin e ka zënë gjumi?
“Sipas informatave që i kam nga policia që ka qenë në vendin e ngjarjes, pohimet e shoferit janë të tilla, por mbetet që kjo të konfirmohet”.
Edhe deputetja shqiptare në Kroaci Ermina Lekaj Prljaskaj ka marr informacione se shoferi i autobusit ishte në gjumë.
“Tani për tani kam informacion se shoferi ka qenë në gjumë. Mirëpo më vonë kur do të mbërrijë në vend ngjarje besoj që do t’i marr të dhënat më të sakta nga zëvendësministri për punë të brendshme”, tha ajo.
Autobusi i cili u aksidentua në Kroaci është i kompanisë kosovare “Deva Tours”. Nga kjo kompani për mediat kosovare kanë deklaruar se po presin raportin e policisë.
“Po autobusi jonë është aksidentuar. Jemi shumë të shqetësuar ende nuk i dimë shkaqet sesi ka ardhur deri te aksidenti po presim raportin e policisë”, thanë nga “Deva Tours”.
Autobusi i kompanisë “Deva Tours” i cili po udhëtonte nga Frankfurti për në Prishtinë, ka pësuar sot aksident në Slavonski Brod të Kroacisë, ku si pasojë e këtij aksidenti deri tash janë konfirmuar 10 viktima.