Thaçi: Kosova dhe Serbia në Uashington nuk do të bisedojnë për territore

Presidenti i Kosovës, Hashim Thaçi e ka pranuar ftesën e të dërguarit të posaçëm të presidentit amerikan Donald Tramp për bisedime mes Kosovës dhe Serbisë, ambasadorit Riçard Grenell, për t’u takuar në Uashington, së bashku me kryeministrin Avdullah Hoti dhe përfaqësuesit e Beogradit për të rifilluar dialogun për gjetjen e zgjidhjes për mosmarrëveshjen mes dy vendeve, njofton korrespondenti i MIA-s nga Prishtina.

Duke folur në konferencë shtypi pas marrjes së ftesës nga Grenell, Thaçi tha se takimi në Shtëpinë e Bardhë, i planifikuar për 27 qershor dhe për të cilin pala serbe tashmë ka konfirmuar pjesëmarrjen e saj, paraqet “hap të rëndësishëm para për Kosovën”.

“Institucionet e Kosovës, pas ftesës nga Tramp dhe Grenell për të vazhduar dialogun në Shtëpinë e Bardhë, u përgjigjën pozitivisht dhe e mirëpresin këtë hap vendimtar dhe shumë të saktë të SHBA-së, me besim të plotë se ka ardhur koha për të ecur përpara si shoqëri, por edhe për paqen në tërë rajonin e Ballkanit Perëndimor. Padyshim, qytetarët e Kosovës meritojnë përparim dhe zhvillim ekonomik”, tha Thaçi.

Ai shprehu besim se takimi në Uashington do të ishte hap drejt arritjes së marrëveshjes përfundimtare mbi mosmarrëveshjen me Serbinë. Kjo marrëveshje, sipas presidentit të Kosovës, do të thotë njohje e ndërsjellë e dy vendeve dhe nuk do të përmbajë ndonjë shkëmbim territoresh ose ndryshim të kufijve.

Kosova, tha Thaçi, gjithmonë i ka besuar Shteteve të Bashkuara të Amerikës dhe gjithmonë ka dalë fitimtare.

“Ftesa për 27 qershor rrit shpresën, optimizmin dhe besimin se ky proces do të jetë i suksesshëm. Para së gjithash, sepse ai ka mbështetjen e qartë të presidentit Tramp dhe për shkak të këmbënguljes së ambasadorit Grenell. Uashingtoni e ka sqaruar, përmes letrave të Trampit, se procesi synon njohjen e ndërsjellë të Kosovës dhe Serbisë, si dhe anëtarësimin e vazhdueshëm në Kombet e Bashkuara dhe organizatat ndërkombëtare. Të bashkuar dhe në partneritet me SHBA-në do të kemi sukses. Kështu ishte në Rambuje, Vjenë dhe kështu do të jetë në Uashington”, tha Thaçi.

Dialogu mes Kosovës dhe Serbisë u pezullua në nëntor të vitit 2018, kur Qeveria e Kosovës, e udhëhequr nga kryeministri i atëhershëm Ramush Haradinaj, vendosi taksën 100 për qind të importeve nga Serbia dhe Bosnja dhe Hercegovina për fushatën e Beogradit për të tërhequr njohjen e pavarësisë së Kosovës, parandalimin e anëtarësimit të saj në Interpol, UNESKO dhe organizata tjera ndërkombëtare.

Për të vazhduar dialogun, ndërmjetësuesi i BE-së në proces, diplomati sllovak Mirosllav Lajçak, pritet të arrijë sot në Prishtinë, por ende nuk dihet nëse Thaçi do të takohet me të.

“Kur Lajçak të arrijë në Kosovë, ekipet tona do të komunikojnë. Nëse ka diçka konkrete, nuk ka pse të mos takohet, ndërsa nëse vjen vetëm për të shqyrtuar terrenin, nuk ka nevojë për takim. Ai duhet të shpreh qëndrimin e tij për liberalizimin e vizave për qytetarët e Kosovës dhe të sqarojë se si do ta trajtojë Kosovën. Nëse e trajton atë si shtet të pavarur, procesi do të jetë më i lehtë”, deklaroi Thaçi, i cili më herët tha se nuk beson në neutralitetin e Lajçakut, sepse vendi i tij nuk e ka njohur pavarësinë e Kosovës, kur ishte ministër i Punëve të Jashtme të Sllovakisë./MIA