Kryetari i Aleancës për Shqiptarët Arben Taravari shprehet se nuk e kanë fare problem të largohen nga Qeveria nëse këtë e kërkon VMRO-DPMNE-ja në këmbim për t’i votuar ndryshimet kushtetuese.
“Në qoftë se del dikush që është i rëndësishëm për të bërë ndryshimet kushtetuese, shembull VMRO thotë duhet Aleanca të largohet prej Qeverie, ne i votojmë. Aleanca jo nesër, sot largohet nga Qeveria komplet. Le të urdhërojnë le të bëjnë Qeveri të zgjeruar, le të votohen ndryshimet kushtetuese le të shpallen zgjedhjet, shkojmë në zgjedhje”, pohoi Arben Taravari, kryetar i Aleancës për Shqiptarët.
Taravari shprehet optimist se ndryshimet mund të bëhen, por shton se për këtë nuk mund të garantojë askush. Pohon se ka komunikime dhe sinjale me eksponentë të VMRO-DPMNE-së. E në rast se ndryshimet dështojnë, shprehet se ASH në kuvend do të përkushtohet për heqjen e 20%-shit për shqiptarët! Kritikoi politikanët shqiptarë që tani po e ngrenë zërin për heqjen e 20%shit, e që nuk kanë folur kur ka qenë koha!
“S’mundesh më ta ndryshosh kornizën. Pse Izet Mexhiti atëherë nuk është ngritur, të thotë unë nuk e votoj sepse në kornizë nuk e keni vendosur. Pse Besa, Fadil Zendeli, se deputeti tjetër nuk është më me Besën, pse nuk është ngritur, se e shoh Fadil Zendelin goxha aktiv, të ngriheshte të thotë unë nuk e votoj se në këtë kornizë ju nuk e keni vendosur 20%. Edhe Zeqirija Ibrahimi se nuk ndalet, t’i them Zeko, duhej vitin e kaluar, tre apo katër deputetë i kishte atëherë, ishe në Qeveri. Duheshte t’u thotë këtyre deputetëve mos e votoni këtë kornizë. Ne dalim prej pushtetit, sepse votoni një kornizë ku nuk parashihet 20%”, pohoi Arben Taravari, kryetar i Aleancës për Shqiptarët.
Ndaj këtyre deklarimeve nuk qëndroi i heshtur sekretari gjeneral i Alternativës, Zeqirija Ibrahimi. Ai i tha TV21 se pikërisht ministrat e Taravarit i kanë nënshkruar propozim ndryshimet kushtetuese dhe nuk e kanë zgjidhur problemin me 20%.
“Unë e kuptoj se kryetari i Aleancës për Shqiptarët është zënë ngusht që tash me duart e ministrave të tij ka nënshkruar që propozim-ndryshimet kushtetuese të mos e zgjidhin problemin ofendues të gjuhës shqipe. Ai dhe partia e tij e kanë shkelur me të dyja këmbët gjuhën shqipe dhe janë bërë bashkë me Soravia-n kundër gjuhës shqipe”, nënvizoi Zeqirija Ibrahimi, sekretar gjeneral i Alternativa-s.
Deri më tani deputeti i Besës Fadil Zendeli nuk na dha qëndrim për këtë çështje. Na tha se do të përgjigjen nga partia.