Aleanca për Shqiptarët shpreh shqetësimin e saj për politikat e jashtme të shtetit. Sekretari gjeneral i kësaj partie akuzoi Qeverinë se nuk është rreshtuar krah Bashkimit Evropian në vendosjen e sanksioneve kundër Rusisë. Taravari gjithashtu tha se këshilli i BE-së ka marrë 21 vendime për të vazhduar sanksionet ndaj Rusisë, por qeveritë Zaev I dhe Zaev II, siç thotë, plot 21 herë kanë refuzuar sanksionet ndaj Rusisë.
“Vendet kandidate si Maqedonia e Veriut, kanë për obligim ligjor të rreshtohen me deklaratat e BE dhe të zbatojnë sanksionet evropiane kur kërkohet një gjë e tillë nga Brukseli. Në marsin e vitit 2014, BE ka vendosur masa kufizuese kundër Rusisë, përfshirë masa diplomatike, ngrirje të aseteve dhe ndalesa udhëtimi, si dhe sanksione ekonomike”, tha Taravari.
Taravari thotë se nga Aleanca për Shqiptarët dhe departamenti për euro integrime kanë analizuar të gjitha deklaratat e përfaqësuesve të lartë të BE-së për politikën e jashtme që kanë të bëjnë me respektimin e sanksioneve, e sipas tij, rezultatet janë shqetësuese për RMV-në.
“BE nuk është lavatriçe për politikanë të korruptuar që mbështesin Putinin dhe agresionin rus, ndërsa kërkojnë integrim në BE. Maqedonia e Veriut duhet të sillet si një vend kandidat, e jo si të ishte ndonjë republikë ish-sovjetike, sepse këtë gjë e presin qytetarët tanë dhe e imponojnë edhe detyrimet tona ligjore ndaj BE-së”, shtoi Taravari.
Taravari gjithashtu shtoi se Maqedonia e Veriut duhet të sillet si një vend kandidat, e jo si të ishte ndonjë republikë ish-sovjetike. TV21 pyeti Qeverinë nëse do te ketë reagim, por deri në fillim të lajmeve përgjigje nuk morëm.