Ministri Arben Taravari është optimist se do të gjendet zgjidhje dhe ndryshimet kushtetuese do të miratohen deri në fund të vitit, madje , siç tha, edhe pa qeveri të qëndrueshme në Bullgari me të cilën autoritetet presin të udhëheqin dialog. Ai e rrit shpresën me vizitën e kryetares së KE-së, Ursula von der Lejen e cila vjen të enjten.
“T’i presim zgjedhjet me 27 tetor, urojmë që edhe atje të ketë një qeveri stabile pas tre vjet e gjysmë, por pavarësisht asaj, Maqedonia patjetër të vazhdojë rrugëtimin e saj europian. Unë jam shumë optimist sepse tani kemi vizitë prej zyrtarëve të lartë BE që vijnë në Maqedoni pasnesër”, tha Arben Taravari – ministër i Shëndetësisë – VLEN.
Taravari theksoi se nëse nuk ndryshohet Kushtetuta kjo do të ndikojë në rezultatin zgjedhor të koalicionit VLEN në zgjedhjet lokale vitin e ardhshëm. Por sipas kryetarit të Besës, Bilall Kasami zgjedhjet janë në plan të dytë.
Nga ana tjetër, BDI me kritika të ashpra për ngecjen e vendit në rrugën drejt BE-së. Kryesia qendrore e partisë ka vlerësuar se ndarja nga pakoja me Shqipërinë është lajm i keq për vendin tonë dhe për qytetarët.
“BDI shqyrtoi zhvillimet për shqetësimet për politikat në vend dhe në rajon. Ndarja e Maqedonisë nga pakoja me Shqipërinë dhe hapërimi i Shqipërisë për anëtarësim të plotë në BE, nuk është lajm i mirë për vendin dhe nuk është i mirë për marrëdhëniet ndëretnike në vend. Ndryshimet kushtetuese sigurisht se do të mbështeten nga BDI, inkurajojmë partnerët e kësaj Qeverie monoetnike, pa legjitimitet etnik, që një çështje të tillë të rëndësishme për anëtarësimin e vendit tonë në BE ta ndërmarrin”, potencoi Arbër Ademi nga BDI.
Paraprakisht ministri për çështje europiane Orhan Murtezani theksoi se ka hapësirë për të gjetur zgjidhje, por shefi i diplomacisë Timço Mucunski tha se pushteti nuk kufizohet me afate dhe përsëriti se pret qeveri të qëndrueshme politike në Bullgari për dialog.