Takim vendimtar Mickoski–Taravari! Kryeministri thotë se Qeveria është stabile edhe pa ASH-në

Sot Kryeministri Hristijan Mickoski takohet me Arben Taravarin, kur edhe pritet të bëhet e qartë nëse ASH do të vazhdojë të jetë pjesë e Qeverisë. Taravari pritet të sqarohet nëse ka bashkëpunim me BDI-në, gjë është e papranueshme për Mickoskin. Me apo pa zotëri Taravarin Qeveria është stabile tha Kryeministri Mickoski.

“Askënd në jetë nuk e kam lutur dhe nuk do ta lus. Me apo pa zotëri Taravarin Qeveria është stabile, e fortë me shumicë të madhe. Mbetet te ai dhe te bashkëpartiakët e tij të vendosin a do të shkojmë bashkë në rrugën e reformave, sundimi i së drejtës, luftë për shoqëri të drejtë, institucione të cilat do të funksionojnë, apo do të koalicionojnë me ato forca politike të cilat me vite dhe dekada e kriminalizuan dhe e shkatërruan shtetin. Zgjedhja është e tyre”, tha Mickoski.

I pari i Aleancës për Shqiptarët, Arben Taravari tha nëse kryesia e partisë do të vendosin që të bashkëpunojnë me BDI-në, atëherë nuk do të duan që të jenë pjesë e qeverisë. Tash për tash ai thotë se vendimi i vetëm i ASH-së është që në zgjedhje lokale të shkohet me lista të veçanta për këshilltar.

 “Në momentin që do të vendosim, në momentin që kryesia e partisë do të vendose të shkojë me BDI-në, as që duam të jemi pjesë e qeverisë, por tash për tash, Kryesia Qendrore ka vetëm një vendim, që të dalim me listat tona për këshilltarë komunal kurse për bashkëpunime, tani e shoh se me VLEN-in është derë e mbyllur. Në bazë të strukturës demografike të ndonjë komune, ashtu do të jenë edhe bashkëpunimet. Ne jemi parti autonome. Vendosim dhe i sjellim të gjitha vendimet në organet tona partiake. Kur të sjellim ose nëse sjellim që të bashkëpunojmë me ndonjë parti që nuk është në qeveri, nuk e shohim më veten të jemi pjesë e qeverisë”, tha Taravari.

Nga ana tjetër VLEN tashmë ka bërë të ditur se në Kuvend për koordinator të grupit parlamentar do ta propozojnë Bekim Qokun, me çka me shumë gjasa do të jenë gjithsej 9 deputetë. Taravari paralajmëroi se edhe ata gjatë ditës së nesërme do ta formojnë grupin parlamentar.

“Ne ju urojmë suksese, ju urojmë punë të mbarë. Në qoftë se veç është paralajmëruar kjo, ne brenda ditës së nesërme edhe ne do ta kemi grupin tonë parlamentar. Kështu që e shohim se si do të rrjedhin zhvillimet politike”, deklaroi Taravari. 

Në rast se Taravari del nga Qeveria, atëherë në shumicën parlamentare mbetën 9 deputetë dhe 23 në opozitë. Por, javën e kaluar në Click Plus Bilall Kasami nga VLEN tha se nëse hapet dera e Qeverisë dikush do të del dhe dikush do të hyjë. ASH e Ziadin Selës tani për tani po pret për të parë se si do të jenë zhvillimet politike, por Sela para disa ditëve tha se nuk ka bashkëpunim me VLEN-in dhe nuk mendon se duhet, siç tha,  t’i hyjë asaj aventure.