Subvencionim rrogash ka, sepse ka diskriminim?! Zaev premton se plani i ri do të jetë i barabartë për të gjithë!

Plani i Qeverisë që të inkurajojë dhe do të bashkëpunojë me sektorin e biznesit, që privati t’i mbështesë marrëdhëniet e mira etnike dhe vlerat e tolerancës, përfaqësimin dhe besimin e ndërsjelltë, edhe në mjediset e tyre të punës, do të funksionojë në mënyrë të barabartë për të gjitha komunitetet në vend, premton kryeministri Zoran Zaev.

“Besoni se e gjitha do të jetë e barabartë për të gjithë qytetarët, edhe maqedonasit, shqiptarët, turqit, romët, vllehët, boshnjakët, të gjithë në shtet! Përgjithësisht, i dimë në rajone se ku është përqindja e papunësisë, ku janë rajonet më pak të zhvilluara dhe ngjashëm, i kemi ndërtuar si vegla dhe vazhdojmë! Në programin e qeverisë në faqe 39 qartë është precizuar qëndrimi i qeverisë dhe koalicionit qeveritar për këtë çështje!”, theksoi kryeministri Zoran Zaev.

Krejt qëllimi i këtij programi është që diversiteti në kompanitë private të bëhet vlerë pozitive si në të gjithë botën, pohon Ministri i Financave, Fatmir Besimi, duke marrë si shembull që shefi ekzekutiv (CEO) i Alfabetit dhe filialit të saj Google është një indian. Se si do të realizohet gjithçka varet nga bashkëpunimi me komunitetin e biznesit.

“Tregu do të determinojë se si kompanitë do të reagojnë në treg. Premisa kryesore, me shekuj, në funksionimin e ekonomisë së tregut janë parakushtet e tregut. Atë që shtetet në politika të ndryshme, sociale ose me karakter tjetër, janë për mbështetje të ekonomisë, mes tjerash në rastin konkret promovim dhe mbështetje e diversitetit të realitetit tonë shoqëror”, tha Fatmir Besimir – Ministër i Financave.

E kur jemi tek diversiteti, Qeveria, deri më tani, përmes masave të veçanta, ka mbështetur edhe punësime të komuniteteve të veçanta në vend.

Këtë e dëshmon edhe kjo masë për “Subvencionim të rrogave” nga Agjencia për Punësim, e përmes së cilës do të krijoheshin vende të reja të punës në ndërmarrjet e vogla dhe të mesme. Përskaj kategorive të tjera të qytetarëve, këtu pikaset edhe punësimi në bazë etnike.

Parashihet punësim edhe për “Persona pjesëtarë të bashkësisë etnike rome” si dhe “Gra pjesëtare të bashkësisë etnike rome si dhe të bashkësive të tjera etnike”.

Nga Agjencia e Punësimit, sot nuk mundeshin të na përgjigjen, por jozyrtarisht na u tha se bëhet fjalë për masa për mbështetje për grupet e margjinalizuara. Kjo shkruhet edhe në thirrjen e Agjencisë, ku theksohet se bëhet fjalë për të papunë “që vështirë kyçen në tregun e punës”.

Si do që të jetë, kjo dëshmon se ka punësime në baza etnike, për shkak se diskriminime bëhen, edhe pse Kushtetuta në nenin 32 e definon qartë se “secili, në kushte të barabarta, e ka të arritshëm çdo vend pune”.