Spasovski mohon të jetë zënë me Bushin!“Gënjeshtër, kemi marrëdhënie të shkëlqyeshme”!

Ministri i Brendshëm Oliver Spasovski mohon që ditë më parë të ketë pasur mosmarrëveshje me zëvendësin e tij Nazim Bushin.

“Absolutisht gënjeshtër!”, tha Spasovski.

TV21 jozyrtarisht ka mësuar se ditë më parë zëvendësministri nga radhët e BDI-së, Nazim Bushi, i ka kërkuar ministrit Spasovski të rishikojë një listë emrash të të punësuarve në MPB që me vite nuk ishin avancuar dhe që kjo çështje të zgjidhet, por siç mësohet, ministri socialdemokrat nuk ka pranuar ta bëjë një gjë të tillë, që ka sjellë debat në kabinetin e Spasovskit.

Ministri Spasovski mohon të ketë pasur mosmarrëveshje, por dy ditë më parë, ai bashkë me zëvendësin Bushi, u pritën nga zëvendëskryeministri i parë Artan Grubi, ndërsa zyrtarisht u njoftua se temë e takimit ka qenë shpërndarja e nëpunësve administrativ të punësuar sipas programit K5 me qëllim përmirësimin e përfaqësimit të drejtë dhe adekuat nëpër institucionet shtetërore.

“Në frymën e bashkëpunimit të mirë, Spasovski dhe Bushi përshëndetën rregullimin e çështjes së nëpunësve administrativ të cilët deri më tani kanë qenë të pa sistemuar nëpër vende të punës.
Ata shprehën gatishmërinë për bashkëpunim dhe për sukses të përbashkët”.

Spasovski pohon se marrëdhëniet me zëvendësin e tij i ka shumë të mira!

“Të shkëlqyeshme!”, tha Spasovski.

Spasovski konfirmon se ka bërë shaka kur nuk e lejoi zëvendësministrin e i tij të flasë sepse është i gjobitur për mosmbajtje të maskës, ndërsa konfirmon se këtë ia ka sqaruar edhe Bushit.

“Mirë e paskeni marrë vesh”, shtoi Spasovski.  

Ndalesa për të folur që Spasovski ia bëri Bushit në konferencë për media, zëvendëskryeministri i parë Artan Grubi e quajti humor të keq, e që është sqaruar pasi ministri e ka telefonuar Grubin duke i thënë se nuk ka pasur ndonjë tendencë për fyerje.