Sonte pa orë policore, turistët më të kënaqurit

“Për shkak të Pashkëve sonte nuk do të kemi orë policore, megjithatë kafenetë dhe restorantet, sipas vendimit të Qeverisë, do të duhet të mbyllen në orën 20.30”, raporton gazetari, Besir Arifi.

Kafenetë mbyllur, por shëtitjet në sheshin Maqedonia vazhdojnë.

Dikush mendon se mbyllja është e mirë, por turistët aspak nuk pajtohen me këtë gjë.

“Është shumë e rëndësishme të ndikohet tek vetëdija e qytetarëve, të jenë të kujdesshëm, me orë policore ose pa të, ata të mbajnë llogari, sepse kjo ndodhi tek ne që e kaluam koronën, kur kishim pak frikë e pas kësaj filluam të mbajmë më shumë llogari”, tha një qytetar i Shkupit.

“Për mua është katastrofë sepse ky imazh i bën turistët të mos vijnë më. Bëjmë 2 mijë kilometra për të ardhur këtu për të kaluar kohë të mirë për 3 ditë, po gjithçka është e mbyllur andaj presim sa të kthehem në shtëpi. Qyteti është i bukur, njerëzit e mirë, por më vjen keq…”, tha një turiste nga Polonia.

“Sipas meje zbutja e masave nuk është diçka e mirë. Mbyllja e kafeneve është diçka e mirë. Të paktën në kafene të ndërmerren masa të dobishme për të gjithë”, u shpreh studenti nga Turqia.

“Do të shëtisim pak dhe pastaj do të shkojmë në hotel do të rijmë. Na vjen mirë që është pak lëvizje e lirë dhe mundemi lirisht të lëvizim dhe të kënaqemi me bukuritë e Shkupit”, vlerëson turisti nga Kosova.

Ora policore rikthehet nesër duke nisur nga ora 21 deri në orën 5 të mëngjesit.

Mbyllje nuk do të ketë as për festën e Bajramit, më saktësisht mes datave 12 dhe 13 maj.