Sofja kundër ideve të reja për ndryshimet kushtetuese – Nikolloski: T’i rregullojnë çështjet në shtëpi, pastaj do të bisedojmë

Zëvendëskryeministri Aleksandar Nikolloski me ton të ashpër iu drejtua autoriteteve bullgare. U tha që “më parë t’i zgjidhin gjërat në shtëpi”. Kjo vjen pasi Ministria e Punëve të Jashtme e Bullgarisë hodhi poshtë mundësinë për ide të reja për rinegociim dhe theksoi se ide të tilla vetëm mund ta largojnë vendin nga BE-ja. Nikolloski thotë se do të presin qeveri të qëndrueshme politike në Sofje për të zhvilluar bisedime.

“Kryesia në Shkup duhet ta ketë të qartë se përpjekjet për të dalë me ide për rinegociim për detyrime tashmë të ndërmarra ndërkombëtare mund të çojnë vetëm në një largim të ri nga fillimi i negociatave për anëtarësim në Bashkimin Europian”, thotë MPJ e Bullgarisë.

“Janë aq jofunksionalë që nuk mund as zgjedhje të caktojnë. Kjo është qeveria e 7-të apo e 8-të teknike, tashmë nuk mund të gjejnë njerëz për në qeveri teknike, kështu që le t’i rregullojnë së pari çështjet në shtëpi, le të zgjedhin qeveri politike dhe të ulemi për të folur me qeverinë politike”, tha Aleksandar Nikolloski, zv/kryeministër.

Paraprakisht, kryeministri Hristijan Mickoski tha se duhet të zhvillohen bisedime me Sofjen për zhbllokimin e procesit të integrimeve europiane dhe përmendi mundësinë për aneks të propozimit francez, por ato bisedime do të zhvillohen vetëm me një qeveri të qëndrueshme politike.

“Qeveria Teknike e Republikës së Bullgarisë është një qeveri legjitime, e cila ka të gjitha prerogativat për të menaxhuar shtetin. Mbetet e hapur për dialog me Maqedoninë e Veriut dhe në të njëjtën kohë theksojmë se, pavarësisht nëse zhvillohet me qeveri teknike apo të rregullt, dialogu nuk përfshin rinegocimin e detyrimeve tashmë të ndërmarra nga Shkup”, deklaroi MPJ e Bullgarisë.

“Nuk kam për qëllim që t’u përgjigjem njerëzve të cilët vrapojnë pas pikëve politike e që për momentin janë margjinalë politikë në Bullgari, për shkak se janë përfaqësues të qeverisë që nuk ka legjitimet prej askujt”, u shpreh Nikollovksi.

Nga MPJ-ja bullgare po ashtu shtuan se Maqedonia, për shkak të provokimeve të panevojshme dhe konfrontimeve me fqinjët, tashmë ka humbur shumë kohë në procesin e eurointegrimeve.