Përveç që Republikën e Kosovës e quan “Kosmet”, shkurtim i emërtimit “Kosovo i Metohija” që e përdor Serbia, edhe këndoi për heronjtë serb që luftuan në mesjetë.
“Oj Kosovë, oj Kosovë,
Vendi im i dashur,
Vendi i kalorësve të famshëm
I Llazarit dhe Milloshit”.
Ky është kryetari i Komunës Qendër të Shkupit, Sasha Bogdanoviq, i cili javën që shkoi u kurorëzua në Graçanicë të Kosovës.
Bogdanoviq vjen nga Lidhja Socialdemokrate e Maqedonisë, parti e cila në dy palë zgjedhjet e fundit ka marrë mijëra vota shqiptare në Maqedoni.
Kryetari i LSDM-së, Kryeministri Zoran Zaev, distancohet nga Bogdanoviqi duke dënuar çdo provokim ose mesazh irredentizmi që do të lëndonte ndjenjat e dikujt.
“Nëse është ai, ose dikush nga mysafirët, duhet të mbahet përgjegjësi për këtë punë. Dua të jem i qartë për këto çështje, ne i mbështesim fqinjët tanë, nxisim dialog që do të sjellë paqe në Ballkan”, tha Zoran Zaev – kryeministër.
Reagon edhe ambasadori i Kosovës në Shkup, Gjergj Dedaj. Për TV21 tha se sjellja provokuese e kryetarit te komunës Qendër në ceremoni private në Graçanicë të Kosovës, është e pa pranueshme, provokuese dhe me gjasë nën ndikim te alkoolit.
“Edhe Bogdanoviq, sikur e gjithë bota, e dinë se Kosova nuk është dhe nuk do te jetë kurrë pjesë e Serbisë. Republika e Kosovës është shtet i lirë, demokratik, evropian dhe i pavarur, i cili synon integrimet euro-atlantike dhe fqinjësinë e mirë me të gjitha vendet e rajonit duke përfshirë edhe Serbinë. Ëndrrat e Bogdanoviq dhe ekstremistëve serb si ai, tashmë janë hedhur në koshat e mbeturinave dhe i takojnë së kaluarës së errtë millosheviqiane!”, theksoi për TV21, Ambasadori i Republikës së Kosovës në Maqedoninë e Veriut, Gjergj Dedaj.
Maqedonia e Veriut e ka pranuar pavarësinë e Kosovës në vitin e parë të shpalljes, më 9 tetor 2008.