Komisioni Evropian paralajmëroi se vendimi i qeverisë së Sllovakisë për të vendosur çmime të ndryshme të dizelit për automjetet me targa vendase dhe ato të huaja për një periudhë 30-ditore përbën diskriminim dhe bie ndesh me ligjet e Bashkimit Evropian.
Drejtuesit e automjeteve me targa të huaja në Sllovaki aktualisht paguajnë mesatarisht 1,83 euro për litër dizel, rreth 20% më shumë se konsumatorët vendas.
Zëdhënësi i KE-së, Ricardo Cardoso, theksoi se masat e shteteve anëtare në situata të tilla duhet të jenë të koordinuara dhe nuk duhet të diskriminojnë drejtuesit në bazë të shtetësisë. Ai shtoi se Komisioni do të ndërmarrë hapa ligjorë për të siguruar përputhshmërinë me legjislacionin e BE-së.
Kryeministri i Sllovakisë, Robert Fico, kishte deklaruar më herët se nuk pret që KE të nisë procedurë formale, pasi masa është e përkohshme dhe do të zgjasë vetëm 30 ditë. Megjithatë, vendimi tashmë ka tërhequr vëmendje të madhe në Bruksel.
Qeveria sllovake vendosi çmime të ndryshme të dizelit për të mbrojtur konsumatorët vendas dhe për të penguar drejtuesit nga vendet e tjera, veçanërisht nga Polonia, që të furnizohen me karburant më të lirë në Sllovaki.
Përvoja e mëparshme në BE tregon se Brukseli reagon shpejt në raste të tilla. Në vitin 2022, Komisioni Evropian nisi procedurë kundër Hungarisë për një praktikë të ngjashme diskriminuese ndaj automjeteve me targa të huaja, ku drejtuesit vendas paguanin 60–70% më pak për karburant.