Sindikatat e përçara shënojnë 1 Majin, kërkojnë më shumë të drejta për punëtorët

Me “Internacionalen” që thërret “ngrihuni ju o të munduar, ju te urët skllevër anë e mbanë” e nisën shënimin e ditës së punës, por edhe ky 1 maj, sindikatat e punëtorëve i gjeti të përçara!

Edhe pse punëtorët kanë njëqind halle mbi kokë, me të drejta të shkelura, paga të papaguara e vende të humbura pune, por as sot sindikalistët nuk e panë të udhës që në një vend ta ngrenë zërin së bashku. Lidhja e Sindikatave u mblodh para selisë së saj, Konfederata e Organizatave Sindikale tek e vetja, e Konfederata e Sindikatave të Lira protestoi para Qeverisë.

“Të gjithë në vende të ndryshme. Nuk na ftuan… nuk paska pasur vend… qenkan me pika, s’paska vend…”, deklaroi Bllagoja Ralpovski, kryetar i KSL-së.

Kryetari i LSM-së thotë se të ftuar kanë qenë të gjithë punëtorët dhe se mbledhja bëhet duke respektuar masat mbrojtëse.

“Pse nuk ka bashkim tek sindikatat? Nuk mund ta them unë këtë. Secila konfederatë ka organet dhe trupat e saj të cilat vendosin se si do ta festojnë 1 majin ose çfarë vendimesh do të sjellin”, deklaroi Darko Dimovski, kryetar i LSM-së.

E ndonëse të pa unifikuar, ankesat dhe kërkesat për punëtorët i kanë thuajse të njëjta. Si vitin e kaluar, edhe këtë vit pandemia mbetet sfida më serioze për punëtorin.

“Maqedonia me indeksin 4, respektivisht shkelje sistematike të të drejtave, sipas indeksimit që e bën Konfederata Ndërkombëtare e Sindikatave është karakterizuar si vend që nuk ka të drejta të punëtorëve”, deklaroi më tej Ralpovski.

“LSM pret që Qeveria që përskaj aktiviteteve për përballje me krizën dhe stabilizimin ekonomik, të fillojë t’i përmbushë premtimet e programit të saj që ishte bazë për marrjen e mandatit”, shtoi Dimovski.

“Kjo gjendje me krizën kovid tregoi se askush nuk mendon për punëtorët. Ata janë lënë vetëm”, shprehet Marjan Ristevski nga KOS.

Rinia e LSM-së theksoi se të rinjtë janë kategoria më e rrezikuar sepse punojnë në të zezë, me kontrata me kohë të pacaktuar, marrin paga të ulëta dhe punojnë në pozita të pasigurta.

“Prandaj ne si të rinj kërkojmë nga partnerët socialë që në ligjin e ri për marrëdhënie pune, kufizimi i kontratave për kohë të caktuar nga 5 vjet të ulet në 1 vit”, tha Irena Siljanovska nga LSM-ja.

Kërkesë për përmirësim të kushteve të punës ka edhe sindikata e industrisë dhe projektimeve.

“Të realizohet kërkesa jonë për stazh të privilegjuar për kolegët tani që ditë e natë punojnë në kushte të këqija ekstreme dhe me nivel të lartë rreziku. E diela të bëhet ditë jo pune”, u shpreh Ivan Peshevski.

U kërkuar sjellja e një ligji të ri për marrëdhënie pune sipas standardeve evropiane, pushim lindjeje 12 muajsh, rritje e pagës minimale e cila duhet të shkojë të paktën 60% e rrogës mesatare, si dhe pensionim mbi baza të ndryshme si mosha, stazhi dhe pensionimi i parakohshëm.