Ministri hungarez i Punëve të Jashtme dhe Tregtisë, Péter Szijjártó, deklaroi sot se nuk pritet përparim lidhur me bllokimin e tubacionit të naftës “Druzhba” para zgjedhjeve të prillit në Hungari.
Ai vlerësoi se nëse qeveria aktuale në Budapest mbetet në pushtet edhe pas zgjedhjeve, Ukraina do të duhet të arrijë një marrëveshje, sepse, siç theksoi, “më mirë Kiev do të mbetet pa para sesa Hungaria pa naftë”.
Ndërkohë, ministri ukrainas i Energjisë, Denys Shmyhal, njoftoi se ende nuk është marrë një vendim për rifillimin e punës së këtij tubacioni drejt Hungarisë dhe Sllovakisë.
Szijarto, sipas raportimit të MTI-së, deklaroi se nuk pret lëvizje për çështjen e ndërprerjes së furnizimeve me naftë ruse përmes tubacionit “Druzhba” deri pas zgjedhjeve parlamentare, sepse, sipas tij, Ukraina po përpiqet të ndikojë në rezultatin e tyre duke ndaluar transportin. Sipas tij, kompania ukrainase që menaxhon tubacionin ka informuar disa herë kompaninë shtetërore hungareze të naftës, MOL, se tubacioni është në gjendje të mirë dhe po pritet vetëm një vendim politik.
“Situata është e qartë. Nëse fitojmë zgjedhjet, çka është shumë e mundshme, dhe vazhdojmë të qeverisim vendin, ukrainasit do të duhet të bashkëpunojnë me ne. Paratë e tyre do të shterojnë para se nafta jonë të mungojë,” theksoi Szijarto.
Ai vlerësoi se lufta sot është një “model biznesi” në Ukrainë, duke pretenduar se vendi ka marrë 193 miliardë euro nga BE-ja gjatë katër viteve të fundit, më shumë se sa do të prodhonte ekonomia e tij në kushte paqeje.
Nga ana tjetër, ministri ukrainas Denys Shmyhal tha se Naftogaz po përfundon analizën e dëmeve në impiant, pas së cilës do të përcaktohen kostot dhe afatet për rikonstruksionin. Sipas tij, një incident në njërin prej rezervuarëve ka shkaktuar dëmtime të brendshme të konsiderueshme, të cilat nuk duken nga sipërfaqja.
Nafta ruse nuk rrjedh përmes “Druzhba” drejt Hungarisë dhe Sllovakisë që nga 27 janari. Qeveria sllovake më 18 shkurt shpalli gjendje emergjence për shkak të mungesës së naftës, dhe Robert Fico deklaroi se ka kërkuar ndalimin e furnizimeve emergjente me energji elektrike për Ukrainën si përgjigje ndaj kësaj situate.