Siguria në trafik në Maqedoninë e Veriut: “2021-shi viti me numrin më të vogël të viktimave në 15 vite”

Mosrespektimi i sinjalistikës rrugore nga shoferët, por edhe kalimi i rrugës vend e pa vend nga ana e këmbësorëve, janë arsyet më të shpeshta të aksidenteve, shpesh edhe deri në humbje jetësh. Nga Ministria e Punëve të Brendshme thonë se viti i kaluar ka qenë me numrin më të vogël të viktimave në trafik në këto 15 vitet e fundit, ndërsa zëdhënësi Toni Angellovski, shprehet se edhe të dhënat për muajt e parë të këtij viti tregojnë trend të zvogëlimit të numri të viktimave në trafik.

 “Në tremujorin e parë kemi 18 viktima, që në krahasim me vitin e kaluar, janë 10 më pak, sepse vjet kemi pasur 28 viktima në tremujorin e parë. Sa i përket muajit mars, kemi 4 viktima të pjesëmarrësve në trafik, që në krahasim me vitin e kaluar është 4 herë më pak, vjet kemi pasur 16 viktima”, tha Toni Angellovski, zëdhënës MPB.

Dekani i Fakultetit të Sigurisë, Nikolla Dujovski, apelin më të madh për kujdes e ka ndaj të rinjve.

 “Dua që në veçanti t’u drejtohemi të rinjve, t’i mbrojmë, të jenë të kujdesshëm për vete dhe pjesëmarrësit e tjerë ë trafik. Me të vërtetë nuk janë të mira pamjet nëpër media kur shohim se si familjet qajnë për familjarët e humbur andaj të gjithë bashkë duhet t’i përgjigjemi kësaj sfide”, theksoi

Nikolla Dujovski, dekan i Fakultetit të Sigurisë.

E Dejan Andonoviq nga Këshilli Republikan për Siguri në Komunikacionin Rrugor kërkon që edhe këmbësorët të jenë më të kujdesshëm.

 “Këmbësorët janë kategoria më masive por edhe më e padisiplinuar e pjesëmarrësve në trafik. Të gjithë ne fillimisht jemi këmbësorë e më pas të tjerët. Duhet të dimë dhe apelojmë se në trafik nuk ka përparësi absolute, respektoni rregullat, sinjalistikën, kalojeni rrugën atje ku është e shënuar”, tha Dejan Andonoviq, zëdhënës KRSKRr.

Për të rritur ndërgjegjen në trafik, sot në Kumanovë u organizua aksion në kuadër të fushatës “Unë dhe ti, të gjithë jemi këmbësorë, siguria në vend të parë”.