Eksperti kryesor për sëmundje ngjitëse në SHBA, dr. Entoni Fauçi, deklaroi se shumica e amerikanëve do të kenë qasje te vaksina deri në mes të verës.
Në edicionin e sotëm të “Mirëmëngjesi Amerikë”, Fauçi shprehu pritje që vaksinimi masiv i popullatës “të fillojë diku kah fundi i marsit – fillimi i prillit”.
Dozat e para ishin aplikuar javën e kaluar. Punonjësit shëndetësor, punonjësit nga linja e parë dhe personat e moshuar kanë përparësi në këtë fazë fillestare të vaksinimit.
Vetë Fauçi është vaksinuar sot me dozë të vaksinës së prodhuar nga “Moderna”.
Ai në një intervistë shtoi se “definitivisht është e mundur” lloji i ri i koronavirusit i zbuluar në Britani të Madhe të arrijë deri në SHBA.
Ai sërish u bëri thirrje amerikanëve t’i kufizojnë planet e tyre të zakonshme për festim të Krishtlindjeve edhe këtë vit, duke e marrë parasysh kryesisht rritjen e përhapjes së virusit në mbarë SHBA-në