Shtetësia, Zaev reteron apo është i painformuar?! Opozita shqiptare ka në plan ta bllokojë Kuvendin

Opozita shqiptare ka në plan të bllokojë punën e Kuvendit, si të komisioneve po ashtu edhe të seancave plenare, nëse projektligji i tyre për shtetësinë nuk futet në rend dite të komisionit. Shefi i grupit parlamentar i koalicionit Aleanca-Alternativa, Skender Rexhepi, thotë se deri më tani komisioni amë ka pasur dy mbledhje, por ligjin e tyre nuk e ka futur në rend dite.

“E kemi dërguar deri te komisioni amë, do të dërgojmë deri te Kryetari i Kuvendit, në momentin që nuk kemi përgjigje pozitive do të jemi të detyrueshëm të marrim masa demokratike. Ato janë nga pengimi I komisioneve amë ku ne drejtojmë, fare të bllokohen, mungesa e kuorumit por do të diskutohet deri te ajo që të bllokohen seancat e Kuvendit”, tha Skender Rexhepi – ASH-AAA.

Kryeministri Zoran Zaev mendon se bllokada nuk është e nevojshme për këtë çështje. Ripërsërit qëndrimin se janë për zgjidhje të problemit, por propozimi i opozitës shqiptare që me tre dëshmitarë të dëshmohet shtetësia për të vazhdon të mbetet e papranueshme.

“Zgjidhja që propozohet që me 3 dëshmitarë të merret shtetësia, me të vërtetë kam thënë se është e pamundur. Askund në botë nuk është kjo! Duam të gjejmë zgjidhjen që për bazë do të ketë dokument. Kam thënë, një dëftesë nga shkolla fillore, ndonjë të drejtë tjetër të kryer në shtet, që vërteton, të paktën të ketë dëshmi materiale”, tha Zaev.

I pyetur se a janë të gatshëm të heqin dorë nga propozimi i “3 dëshmitarëve”, Rexhepi thotë se për çdo gjë duan që të diskutojnë në komisionin amë.

“Ne të gjitha do t’i diskutojmë bashkërisht. Nuk ka kërkesë. Nuk ka asnjë kërkesë, asnjë amendament. Kjo është vetëm dëshirë e kryeministrit, megjithatë ai nuk është deputet. Nga grupi parlamentar i LSDM-së do të duhet të vijë një propozim i tillë, që ne ta bisedojmë. Çka të bisedojmë kur në letër nuk kemi asgjë?!”, deklaroi Skender Rexhepi – ASH-AAA.

Që në janar, Ministri i Brendshëm, Oliver Spasovski pat deklaruar se kanë hapur debatin për ndryshime ligjore për ligjin për shtetësinë

“Ne punojmë për variante të mundshme të ligjit për shtetësi dhe në bazë të kësaj kur të jemi të gatshëm ne do të kumtojmë në opinion, do ta dorëzojmë në Qeveri, do të kalojë në Qeveri dhe do të shkojmë në Kuvend”, potencoi Oliver Spasovski – Ministër i Brendshëm.

Po edhe dy muaj pas kësaj deklarate të Ministrit, duket në Qeveri ende nuk ka arritur asgjë.

“TV21: A do të propozojë qeveria, dhe kur do të propozojë ligj për shtetësi, sepse mendoj se e keni paralajmëruar?

Zoran Zaev. “Unë nuk e di nëse kemi ligj për shtetësi ose jo… tani ju… mendoj se kemi ligj për shtetësi… nuk e di… le ta thonë nga MPB”.

Përveç kësaj, kryeministri tha edhe se Ministria e Drejtësisë po punon në këtë çështje dhe në përgatitjen e një kundër-propozimi.

“Do ta gjejmë mënyrën. Besoj se po punon  Ministria e Drejtësisë dhe Shërbimi për Evidencën Amë për gjetjen e zgjidhjes që të japim kundër-propozime ose në grupe pune të gjejmë propozim që të zgjidhet edhe kjo çështje”, u shpreh Zoran Zaev – Kryeministër i RMV-së.

Po Ministri i Drejtësisë, duket se nuk di asgjë për këtë.

“Ligji për shtetësi është në përgjegjësi të MPB-së, andaj Ministria e Drejtësisë nuk ka mundësi të ndikojë këtu. Nëse marrim, ne do të japim mendimin tonë. Unë nuk e di se përgatitet kundër-propozim, e di që partitë tashmë janë deklaruar”, tha Bojan Mariçiq – Ministër i Drejtësisë.

Zyrtarisht nga ana e shtetit 850 persona janë konfirmuar se janë pa shtetësi, megjithatë nga ana e opozitës shqiptare pohojnë se ky numër është më i madh.