Katër bletarë janë arrestuar në Kili pas një proteste që kërkonte mbështetje nga qeveria për industrinë e tyre.
Bletarët mbajtën një demonstratë jashtë pallatit presidencial në kryeqytet, Santiago.
Shtatë oficerë policie u pickuan teksa përpiqeshin të hiqnin kosheret e vendosura nga protestuesit për të bllokuar një rrugë kryesore.
Një thatësirë e zgjatur ka shkatërruar bletarinë në Kili, duke prekur burimet ushqimore të bletëve si lulet dhe të korrat.
Për të theksuar kauzën e tyre, bletarët dërguan rreth 60 koshere me rreth 10,000 bletë përpara pallatit dhe penguan policinë të shpërndante demonstratën.
Një nga protestuesit u tha gazetarëve se vdekja e kolonive të bletëve ishte shkatërruese jo vetëm për ta, por për të gjithë botën.
Protestuesit duan reformën e qeverisë për të përmirësuar çmimet e mjaltit ose për të ofruar subvencione për prodhuesit e mjaltit, raporton agjencia e lajmeve Reuters.
Zyrtarët e Ministrisë së Bujqësisë thonë se ndajnë shqetësimin e protestuesve për efektin e thatësirës, duke shtuar se ata kanë ofruar ndihmë prej muajsh për 20 komunitete që përjetojnë mungesë të madhe uji.
Popullatat e bletëve në mbarë botën kanë rënë me shpejtësi vitet e fundit për shkak të humbjes së habitatit, ndotjes dhe përdorimit të pesticideve, ndër faktorë të tjerë./21Media