Më në fund shpresë se edhe Vizbegu do të bëhet me shkollë fillore.
Pas mbledhjes së mbrëmshme të Qeverisë, zëvendëskryeministri Artan Grubi pohoi se janë zgjidhur të gjitha barrierat për ndërtimin e shkollës.
“Me Ministrinë e Arsimit dhe atë të Transportit u tejkaluan të gjitha pengesat për ndërtimin e shkollës në Vizbeg, ndërsa në mbledhjen e sotme të qeverisë u miratua edhe programi për investime kapitale duke përfshirë këtë shkollë në Vizbeg bashkë me atë të Bllacës”, theksoi Artan Grubi – zëvendëskryeministër i parë.
Prindërti janë ata që më së shumti i gëzohen këtij lajmi, të cilët hall të madh e kanë pasur transportin e fëmijëve në shkolla të tjera, në Çair ose Shuto Orizare. Tani shpresojnë që punët të kryhen sa më shpejt.
“Po ditëve të fundit janë shpeshtuar lëvizjet e pushtetarëve, ministrive të arsimit, transportit, kanë kaluar kësaj ane me qenë se koha ka qenë pak e vështirë nuk kemi mundur të takohemi e të bisedojmë më gjërësisht se kur e si do të fillojë, por po shihet se ka lëvizje dhe shpresat janë pak më të mëdha se këtë vit do të fillojë puna e shkollës”, tha Nebi Ibraimi – banor i Vizbegut.
Vizbegasit kanë 20 vite që kërkojnë shkollë në lagjen e tyre. Kjo nuk u bë realitet për shkak të problemeve burokratike mes komunës e ministrive. Ata që e pësojnë janë nxënësit që duhet të bëjnë kilometra për të shkuar në shkolla të komunave përreth, ndërsa transporti i organizuar shpesh u ka munguar.