Me rënien e temperaturave, shkupjanët menjëherë filluan të thithin ajër shumë të ndotur. Grimcat e dëmshme PM10 në ajër disa ditë me radhë janë tre deri në pesë herë më të larta se sa niveli i lejuar. Shkupi njëjtë si viteve të kaluara, në periudhën e dimrit, edhe këto ditë u gjend në top 10 qytetet më të ndotura në botë.
“Çdo vit e njëjta gjë. Po ngulfatemi në ajrin e ndotur. Po vdesim nga ndotja enorme. Deri ku është plani për ajër të pastër? Të gjithë heshtin, duhej të kemi deri në 50% ndotje më të ulët në Shkup. Përgjegjës? Askush!”, thonë nga organizata O2.
Kryetari i Qytetit të Shkupit, Petre Shilegov, thotë se punojnë në uljen e ndotjes së ajrit. Thotë se inspektorët çdo mbrëmje janë në terren dhe kryejnë monitoring serioz me drone termale me qëllim që kapacitetet e caktuara industriale të mos e keqpërdorin shikueshmërinë e dobët për shkak të mjegullës, dhe të lëshojnë gazra të palejueshme.
“Ne punojmë që në thelb ta zgjidhim problemin. Disa herë i kumtoj opinionit se komponentet kryesore janë 3. Njëri është mbikëqyrje inspektuese, besoj se do të pajtoheni të gjithë, që Inspektorati i Qytetit të Shkupit është një nga institucionet më aktive në vend”, tha Shilegov.
Për uljen e ndotjes po punohet edhe në stimulimin e qytetarëve të mos shfrytëzojnë automjetet personale për të udhëtuar. Por gjithashtu do të ofrohen pako speciale për qytetarët që të jenë pjesë e nxehjes qendrore, me çka do të ulet emitimi i gazrave të dëmshëm nga nxehja e amvisërive.