Në pjesën jugore të Vodnos, nga fshati Sonje e Poshtme deri në majën e Vodnos, është bërë shënjimi i shtigjeve malore, si dhe lidhja e këtij segmenti me fshatin Sonje e Epërme, përcjell TV21. Gjatë shtegut janë vendosur tabela orientuese dhe një tabelë informative. Si pjesë e pajisjeve urbane është ndërtuar një strehimore – një pikë e mbuluar ku ecësit dhe alpinistët mund të pushojnë ose të strehohen nga kushtet e pafavorshme atmosferike.
Po ashtu, është bërë rregullimi i shenjave ekzistuese, si dhe riparimi i tabelave të dëmtuara përgjatë shtegut nga Sonje e Epërme deri në majën e Vodnos. Janë vendosur tabela të reja orientuese në pikat fillestare të shtigjeve që më herët ishin dëmtuar ose shkatërruar. Kjo është realizuar në kuadër të Projektit Slavkov, i mbështetur nga Republika Çeke, Sllovakia dhe Austria.
“Projekti Slavkov është një grup prej tre shtetesh të Evropës Qendrore – Austrisë, Republikës Çeke dhe Sllovakisë. Para dy vitesh, tre ministrat e punëve të jashtme e vizituan Shkupin dhe duam të tregojmë se e mbështesim vendin tuaj jo vetëm në planin politik, por edhe në aktivitetet e lira”, tha Jaroslav Ludva – Ambasador I Çekisë Në Shkup.