Zyrtarë amerikanë shpresojnë se çështjet dypalëshe do të mbeten jashtë NATO-së. Ollton Bjulland nga Drejtoria për Europë e Pentagonit në intervistë për Zërin e Amerikës, thotë se SHBA-të do të vazhdojnë të punojnë në përforcimin e marrëdhënieve mes vendeve aleate të NATO-s, mes të cilave edhe Maqedonia e Veriut dhe Greqia. Komenti vijon pasi kryeministri grek Kirijakos Micotakis, paralajmëroi se në samitin e NATO që do të mbahet në Uashington do ta ngrit çështjen e mosrespektimit të Marrëveshjes së Prespës, ndërsa kryeministri i vendit Mickoski do të befasohet në mënyrë të pakëndshme. Njëkohësisht nga Pentagoni kërkojnë që të gjithë të respektojnë marrëveshjet.
“Do të them se SHBA-ja është mbështetës i madh i Marrëveshjes së Prespës dhe se çdoherë i inkurajojmë aleatët dhe partnerët tanë që të respektojnë marrëveshjet dhe t’i lënë kontestet dypalëshe dhe mospajtimet jashtë Aleancës NATO”, tha Ollton Bjulland, drejtoria e Pentagonit për Europë.
Bjulland u bëri thirrje gjithashtu të gjitha palëve të interesuara, duke respektuar marrëveshjet ndërkombëtare, të bëjnë gjithçka që munden që rajoni i Ballkanit Perëndimor të vazhdojë në rrugën e integrimit euroatlantik.
“SHBA-ja ka qenë gjithmonë një mbështetëse e fortë e integrimit euroatlantik të Ballkanit Perëndimor. Ne vazhdojmë të inkurajojmë vendet që të bëjnë reformat e nevojshme në atë rrugë dhe t’u përmbahen marrëveshjeve ndërkombëtare. Mendoj se kur ka padurim për atë që mund të jetë një proces i gjatë i integrimit, mund të krijojë mundësi për zhgënjim dhe Rusia dhe aktorët tjerë keqdashës të përhapin dezinformata dhe të shfrytëzojnë pakënaqësinë e popullit”, pohoi Ollton Bjulland, drejtoria e Pentagonit për Europë.
Samiti i NATO-së në Uashington fillon të martën, ndërsa delegacionin nga vendi do ta udhëheq kryeministri Hristijan Mickoski. Ai më herët tha se emrin “Republika e Maqedonisë së Veriut” do ta përdorë jashtë vendit, por jo edhe brenda vendit në ngjarjet publike. Për paralajmërimet e Micotaksi, Mickoski tha se do të jetë i përgatitur për surpriza të pakëndshme dhe se po përgatit një dokument në të cilin do të shkruhet se cila palë ka realizuar dhe sa obligime nga Marrëveshja e Prespës.