Shabani: Kam realizuar 90% të programit për Vrapçishtin, zyrtarët e BDI të mos vijnë fshehurazi për të prerë shirita

Përveç kanalizimit, që kërkon rreth 20 milionë euro, rreth 90% e premtimeve për Komunën e Vrapçishtit është përmbushur, thotë kryetari Isen Shabani.

“Përveç kanalizimeve gjithçka tjetër programi është përmbushur, 90 e diçka për qind mund të them lirisht”, u shpreh kryetari Shabani.

Po ish-kryetari i Vrapçishtit, tani deputet i BDI-së, Bajram Kadrija dyshon, ndërsa shton se 80-90% e punëve të bëra, janë vazhdimësi e punëve të BDI-së.

“Një, planet urbanistike kanë qenë vazhdimësi. Bekatonizimi i rrugëve ka qenë vazhdimësi, salla e sportit në Dobridoll ka qenë vazhdimësi, tre filtër stacione kanë qenë vazhdimësi”, tha Kadrija.

Ndër temat e nxehta që u diskutua ishte shitja e tokave shtetërore. Kadrija akuzon se ato u janë shitur familjarëve të të punësuarve në Komunë, ndërsa Shabani thotë se shitja është bërë sipas ligjit dhe me ankand publik.

“Dy parcela të mëdha i janë shitur dy pronarëve nga Gostivari të cilët vajzën e kanë pasur të punësuar në Komunë e Vrapçishtit”, pohoi deputeti Kadrija. “Nuk është e vërtetë bre… Ka emër dhe mbiemër kush e ka blerë”, ia ktheu kryetari i Vrapçishtit.

Mes pyetjeve të shumta që shikuesit i drejtuan kryetarit të Vrapçishtit, është për rrugën e fshatit Kalisht, projekt të cilin Shabani e pranon se e ka tërhequr vetë, me kërkesë të ish-ministrit të transportit Sugarevski.

“Kam shkuar dhe ma ka shpjeguar sinqerisht që projekti është i vjetër, i bërë në vitin 2008 dhe nuk ka revidim. (NGjITJE) shqyrtova, nuk ishte i reviduar, nuk kishte leje ndërtimi projekti dhe erdha me një përfundim që patjetër ta tërheq atë projekt”, tha Shabani.

“Është një rënie një dëshirë e Ministrit, i cili është i palës, ka qenë LSDM dhe tërhiqe një fshat tuajin, vendose një fshat tonin që të bëhet një rrugë që nuk e ka rëndësinë e rrugës së fshatit Kalisht”, tha deputeti i BDI-së, Kadrija.

Shabani konfirmoi në ClickPlus se do të garojë edhe për një mandat tjetër në Vrapçisht, ndërsa pret që në zgjedhjet e tetorit opozita shqiptare të fitojë 6 komuna në Pollog.

Kadrija nuk foli për fitoret a humbjet e mundshme, por vetëm shtoi se shpreson që të ndalet degradimi në Vrapçisht. Në fund kryetari aktual i tha që ai dhe zyrtarë të BDI-së të mos shkojnë të presin shirita në komunë për punët që i ka kryer dikush tjetër.

“Ne që i bëjmë ne do t’i presim, mos hyni fshehurazi, 9 mëngjesit, ditë e diele, nuk punojnë as semaforët nganjëherë në Shkup, ditëve diela në 9 ora, a ju vini prisni shirita në Gradec… Leje pash zotin…”, përfundoi Shabani./TV21