LSDM dhe BDI dështuan në plotësimin e premtimit gjatë zgjedhjeve parlamentare se vendi do të anëtarësohet në Bashkimin Evropian dhe për këtë gjë ata duhet të japin dorëheqje, deklaroi kryetari i ASH-së Zijadin Sela. Ai kërkoi dorëheqjen e Kryeministrit Zoran Zaev, Ministrit të jashtëm, Bujar Osmani dhe Zëvendëskryeministrit për çështje evropiane, Nikolla Dimitrov.
“Përgjegjës për atë që ndodhi mbrëmë natyrisht se kanë emër dhe mbiemër dhe ky është kryeministri Zoran Zaev, ministri i Punëve të Jashtme z. Bujar Osmani, ministri për Bashkimin Evropjan z. Dimitrov. Që të tret duhet të dorëhiqen”, theksoi Ziadin Sela – Kryetar i ASH-së.
Sipas Selës duhet të formohet qeveri e zgjeruar dhe bashkë me zgjedhjet lokale duhet të mbahen edhe zgjedhje të parakohshme parlamentare.
“Vendi patjetër duhet të formojë Qeveri të zgjeruar dhe deri në zgjedhjet lokale të arrihet gjuhë e përbashkët edhe me Bullgarinë. Deri atëherë kjo Qeveri të merr përsipër që të zhbllokojë këtë ngërç të radhës. Bashkë me zgjedhjet lokale duhet të shkohet edhe me zgjedhjet parlamentare për shkak të këtij dështimi”, deklaroi kryetari i Aleancës për Shqiptarët, Ziadin Sela.
Sipas Selës, Qeveria Zaev-Ahmeti dështoi për të gjashtën herë në negociatat me BE-në për shkak mos plotësimit të kritereve më të rëndësishme siç është fqinjësia emirë, bashkëpunimi rajonal dhe shteti i së drejtës. Ai shtoi se vendi u përball me veton bullgare për shkak të qasjes mashtruese të politikave të kryeministrit Zaev.