Presidenti i Rusisë, Vladimir Putin, tha se Moska është duke shqyrtuar heqjen e talebanëve nga lista e organizatave terroriste.
Rusia priti këtë javë një delegacion të lartë të talebanëve. Në bisedime morën pjesë edhe zyrtarë nga Kina, Pakistani dhe tetë vende të tjera.
Në deklaratën pas takimit u tha se në Afganistan “duhet të merret parasysh realiteti i ri, që është ardhja e talebanëve në pushtet”.
Rusia, po ashtu, bëri thirrje për mobilizimin e ndihmës ndërkombëtare për të mbështetur Afganistanin.
Talebanët kanë marrë pushtetin në Afganistan në muajin gusht.
Grupi ende konsiderohet organizatë terroriste në Rusi.
Putin tha se Afganistani duhet të marrë mbështetje ekonomike, pasi sipas tij, stabiliteti në vendin e shkatërruar nga lufta është në interes të të gjithë fqinjëve të tij.
Uashingtoni tha se nuk e ka ndërmend të lëshojë gati 9 miliardë dollarë nga rezervat e Bankës Qendrore afgane, që mbahen në SHBA.
SHBA-ja i ka ngrirë ato pasi talebanët kanë marrë pushtetin.
Kjo, me gjithë paralajmërimet nga Kombet e Bashkuara se ekonomia e Afganistanit është në prag të kolapsit dhe se ky vend përballet me krizë të thellë humanitare./21Media