Sekretari amerikan i Shtetit, Marco Rubio, deklaroi sot se Irani “po lutet për një marrëveshje”, ndërsa paralajmëroi se nëse Teherani nuk është i gatshëm për një marrëveshje, “do ta paguajë çmimin”.
“Irani po lutet për një marrëveshje. Duket se Irani nuk është i gatshëm të arrijë një marrëveshje dhe për këtë do të paguajë një çmim. Çmimi që do të paguajë Irani do të bëhet gjithnjë e më i madh çdo natë, derisa të vijnë në vete”, tha Rubio në margjinat e Samitit të Asociacionit të Kombeve të Azisë Juglindore (ASEAN), që po mbahet në kryeqytetin e Filipineve, Manila.
Ai shtoi se infrastruktura industriale e Iranit është shkatërruar dhe se vendi ka pësuar dëme prej “miliarda” dollarësh.
Rubio foli edhe për situatën në Jemen, duke thënë se rebelët Huthi “janë mashtruar nga Irani” dhe se do të kontribuojnë në uljen e tensioneve.
Duke iu përgjigjur pyetjeve të gazetarëve për marrëveshjen e paralajmëruar me Arabinë Saudite për bashkëpunim në fushën e energjisë bërthamore civile, Rubio tha se pas publikimit zyrtar, dokumenti duhet të kalojë procedurën e njoftimit në Kongresin amerikan.
Samiti i këtij viti i ASEAN-it po zhvillohet në Manila nga 20 korriku deri më 23 korrik, me temën “Së bashku të menaxhojmë të ardhmen tonë”. Prioritetet kryesore të takimit janë përmirësimi i sigurisë rajonale, finalizimi i “Kodit të sjelljes në Detin e Kinës Jugore”, përshpejtimi i Marrëveshjes Kornizë për Ekonominë Digjitale të ASEAN-it (DEFA) dhe shënimi i 50-vjetorit të Traktatit të Miqësisë dhe Bashkëpunimit.
Në samit marrin pjesë delegacione nga të 11 vendet anëtare, si dhe partnerë nga SHBA-ja, India, Kanadaja, Rusia, Kina, Koreja e Jugut, Japonia, Australia, Zelanda e Re, Britania e Madhe dhe Bashkimi Evropian.