“Ndodhem në Vizbeg dhe llucet e vogla që i shikoni këtu nuk janë as nga reshjet e shiut e as nga larja e asfalteve apo oborreve të shtëpive që janë këtu përreth. Por është dëmtimi i rrjetit të ujësjellësit në rrugën “1” le të shkojmë dhe ta ndjekim”, raporton Valon Sallai, gazetar në TV21.
Sipas banorëve të lagjes Vizbeg në rrugën “1”, janë dëmtuar gypat e rrjetit të ujësjellësit. Ky problem zgjat për më shumë se dy javë.
Mërgimtari Enes Miftari thotë që ai ka dhjetë ditë që ka ardhur në vendlindje dhe që ditën e parë është përballur me këtë problem. Që sipas tij sikur të mos mjaftonte rruga e pa asfaltuar, tani edhe uji që rrjedh ndikon në përkeqësimin e gjendjes së kësaj rruge.
“Problemi numër një është rruga edhe meqenëse unë jam mërgimtar, kam ardhur tani për pushime, ka rreth dhjetë ditë që jam këtu. Ky problemi është këtu që e shihni me ujësjellësin. Unë kam dhjetë ditë që kaloj këtu e kemi këtë problem. Kemi edhe mungesë të ujit besa shkaku i rrjedhjes së ujit që bëhet pa ndërprerë. Edhe gjithë kohën sa herë që kalojmë me makina dëmtohen makinat, stërpiken, bëhen me baltë, gjithë kohës duhet të rijmë duke i pastruar makinat. Është e pa tolerueshme!”, thotë Enes Miftari, banor.
Ekipi i Televizionit 21 për këtë problem iu drejtua NP Ujësjellësi dhe Kanalizimi, nëse janë në dijeni për të njëjtën, por nuk morëm asnjë përgjigje zyrtare deri në këtë edicion të lajmeve.
Këto defekte sipas banorëve, po shkaktojnë mungesën e ujit të pijshëm në zona të ndryshme.