Rritja e çmimeve të energjisë falimenton qindra kompani në Gjermani

TË FUNDIT

Rritja e papritur e çmimeve të energjisë çoi disa qindra kompani në falimentim në Gjermani në gusht, paralajmëroi instituti ekonomik IWH dhe bankat presin një sasi dukshëm më të lartë të kredive me probleme në vitin e ardhshëm.

Në gusht, 718 kompani deklaruan falimentim, një çerek më shumë se vitin e kaluar dhe instituti vlerëson se e njëjta normë rritjeje do të regjistrohet edhe në shtator.

Në tetor mund të rritet në 33 për qind, nëse krahasojmë numrin e falimentimeve me të njëjtën periudhë të vitit të kaluar, vlerëson instituti.

“Pas një periudhe të gjatë të shifrave të vogla të kompanive në falimentim, tendenca ka ndryshuar në mënyrë dramatike”, tha Steffen Mueller nga IWH.

Shoqata gjermane e biznesit BDI paralajmëroi për një “recesion të madh”. Në një anketë të kryer mes 593 kompanive, më shumë se një e treta e tyre deklaruan se rrezikohen nga falimentimi për shkak të çmimeve të larta të energjisë. Në shkurt, kur filloi lufta në Ukrainë, një vlerësim të tillë e bënë 23 për qind e tyre.

Grupi i industrisë VKU shprehu gjithashtu shqetësimin, duke paralajmëruar se kompanitë lokale të shërbimeve janë në rrezik të falimentimit për shkak të çmimeve të larta të energjisë dhe problemeve të mundshme të pagesës së klientëve.

Një sondazh i institucioneve kryesore të kreditit në gusht tregoi se kreditë me probleme në Gjermani do të rriten në 37.6 miliardë euro vitin e ardhshëm, nga 31.9 miliardë këtë vit.

“Klientët tanë të korporatave nuk përjetuan një valë falimentimesh gjatë pandemisë, tha Helmut Schleweis, president i Shoqatës Gjermane të Bankave të Kursimeve, në një konferencë të fundit bankare.

“Sot, megjithatë, nuk mund të përjashtohet më, vetëm se shkalla (e falimentimeve) ende nuk mund të kuantifikohet, theksoi ai.

Christoph Schalast, një profesor në Shkollën e Financave dhe Menaxhimit të Frankfurtit, tha se kreditë me probleme nuk u rritën ndjeshëm gjatë pandemisë, sepse shteti ndihmoi kompanitë me programe mbështetëse.

“Por situata ka ndryshuar në mënyrë drastike. Tani kemi faktorë të tjerë, si inflacioni, ndërprerjet e zinxhirit të furnizimit, lufta në Ukrainë dhe rritja e normave të interesit”, tha ai.

Disa ekspertë paralajmërojnë se nga shifrat që tregojnë rritjen e numrit të falimentimeve nuk duhen nxjerrë përfundime të gabuara.

Ata mund të duken keq tani sepse u reduktuan artificialisht gjatë pandemisë, në 2020 dhe 2021, kur qeveria mbështeti kompanitë në vështirësi për ndihmën shtetërore dhe pezulloi ligjin që i detyronte ata të paraqisnin për falimentim, shpjegojnë ata.