Riatdhesohen shtetas nga zonat e luftës në Lindje, 4 burra, 5 gra dhe 14 fëmijë kthehen në Maqedoninë e Veriut

Maqedonia e Veriut ka riatdhesuar pjesëtarë në luftërat në Lindjen e Mesme si dhe familjet e tyre. Janë 4 burra, 5 gra dhe 14 fëmijë që do të riatdhesohen nga Siria dhe Iraku, informojnë nga Qeveria, duke shtuar se procesi është kryer me sukses në përputhje me obligimet që ka shteti sipas të drejtës ndërkombëtare, të drejtave të njeriut dhe të drejtave humanitare ndërkombëtare.

“Ndaj katër luftëtarëve të jashtëm terroristë, pas dëshmive të siguruara paraprakisht nga ana e Ministrisë së Punëve të Brendshme – Byroja për siguri publike, dhe në koordinim me Agjencinë për Siguri Nacionale, janë parashtruar kallëzime adekuate penale në pajtim me legjislaturën nacionale. Për shkak të mosqasjes së tyre për organet e ndjekjes, për njëjtët ishin shpallur fletarreste ndërkombëtare, ndërsa në mungesë të tyre, është përcaktuar masë e paraburgimit, me vendim të gjykatësit kompetent”, thonë nga Qeveria e Maqedonisë së Veriut.

Kështu, nëse 4 burrat do të shkojnë në qeli paraburgimi, nga Qeveria informojnë se gratë dhe fëmijët e riatdhesuar fillimisht sipas vullnetit të tyre do të qëndrojnë në karantinë 14 ditore për kontrollet mjekësore të domosdoshme. Më pas shërbimet kompetente do të punojnë për sigurimin e dëshmive për veprime të mundshme kriminale, për çdo rast në veçanti. Në rast se nuk kanë bërë vepra të dënueshme, duke respektuar plotësisht vullnetin e tyre, do të nisë procesi i rehabilitimit, risocializimit dhe riintegrimit, shkruhet në njoftim.

Samet Shabani nga “Horizon Civitas” që merret me këto procese, tregon për TV21 se tani më e rëndësishmja është që shërbimet sociale e ato psikologjike të bashkëpunojnë mes vete për të pasur proces sa më efikas. Maqedonia e Veriut ka plan nacional për integrimin dhe risocializimin e të rikthyerve, i cili ka marrë vlerësime pozitive nga ndërkombëtarët, por sipas Shabanit tani mbetet të shihet nëse vendi theksin do ta vendosë tek politikat sociale, se sa tek ajo që të riatdhesuarit të shihen si rrezik për sigurinë.

 “Nga janari 2021 ka filluar implementimi i programeve të ndryshme të drejtpërdrejta dhe deri më tani, së paku nga vlerësimet që i kemi marrë nga kontaktet e ndryshme që kemi pasur qoftë edhe me familjet, por edhe me qendrën për punë sociale, vlerësimi jonë si Organizatë joqeveritare kanë qenë se janë në drejtim të duhur dhe ka një kontakt efikas nga ana e qendrës për punë sociale dhe vlerësojmë se këto përpjekje do të mund të vazhdojnë më tej në një mënyrë mjaft profesionale si dhe efikase”, tha për TV21, Samet Shabani – Horizon Civitas.

Jozyrtarisht merret vesh se të riatdhesime janë bërë edhe në vende të tjera të Ballkanit, por për to deri më tani nuk ka njoftime zyrtare, përveç Kosovës, Ministri i Brendshëm i së cilës, në Facebook ka informuar për kthimin e 11 shtetasve nga zonat e konfliktit në Siri, ndërsa ka shkruar se “Kosova gjithmonë do të jetë shtëpia e qytetarëve të saj”.