Regjistruesit po i kthejnë laptopët! Selami: Vendimi është i gabuar, regjistruesit le t’i mbajnë laptopët

Të enjten në mëngjes, këta laptopë duhej të ishin gati për regjistrimin e qytetarëve.

Por, dy ditë para se të fillojë regjistrimi rezident në terren, regjistruesit po i kthejnë laptopët aty ku i morën.

Kjo po ndodh një ditë pas takimit të Zoran Zaev dhe Hristijan Mickovski, të cilët u morën vesh që regjistrimi të shtyhet.

Menjëherë pas këtij takimi,  regjistruesve u është dërguar mesazh që menjëherë t’i kthejnë laptopët.

“Të nderuar, me 30 mars nga ora 15 duhet ti ktheni laptopët ashtu siç i keni pranuar dhe gjithë materialin tjetër të pranuar tek salla e komunës së Tetovës”.

Por kështu nuk thotë zv/drejtori i Entit shtetëror për statistika Ilmi Selami.

Sipas tij laptopët duhet të qëndrojnë tek regjistruesit derisa ligji është në fuqi.

 “Ky hap është i gabuar, u vlerësua nga ana ime si i gabuar u ulëm në mëngjes dhe biseduam dhe u dakorduarm që regjistruesit dhe instruktorët rajonal t’i mbajnë laptopët ashtu siç i kanë marrë, sepse edhe për ne vlen ligji i cili është në fuqi tani dhe deri sa Kuvendi nuk sjell ndonjë ligj tjetër për shtyrje për ndryshim, apo plotësim apo diçka tjetër. Dmth ne kemi ligjin në fuqi kemi afatet të cilët duhet t’i respektojmë dhe jemi të obliguar të nijetin ta respektojmë”, tha për TV21, Ilmi Selami – zëvendësdrejtor i Entit Shtetëror për Statistikë.

Ilmi Selami tha se nga ana e Entit Shtetëror për Statistika do të respektohet ligji aktual deri sa të ndryshohet ligji.

Ai tha se ky institucion është gati për të vazhduar regjistrimin me 1 prill.

 “Dhe tani në qoftë se vije puna dhe na kap afati që duhet filluar me zbatimin e regjistrimit gjithsesi ne jemi të obliguar që ta zbatojmë të njëjtën. Andaj shfrytëzoj rastin të bëjë thirrje, ne e kuptojmë vullnetin politik dhe të partive politike ne e kuptojmë vullnetin edhe të institucioneve, ministri, parlament, mirëpo të kenë kujdes dhe të bëjnë hapa më të përshpejtuar nëse veç me kanë vendosur të ndryshojnë ligjin dhe le ta bëjnë me shpejt se dhe ne jemi në situatë të palakueshme”, shtoi zëvendësdrejtori i Entit Shtetëror për Statistikë, Ilmi Selami.

Në emisionin Click Plus mbrëmë kryeparlamentari Talat Xhaferi tha se nëse Zaev dhe Mickoski janë marrë vesh për ta prolonguar regjistrimin ajo duhet të shndërrohet në ligj, dhe për atë nevojiten procedura parlamentare.