Regjistrimet në UEJL, aplikimet në formë online, selektimi në bazë të notës mesatare!

Kanë filluar regjistrimet në Universitetin e Evropës Juglindore. Aplikimi bëhet në formën online, ndërkaq studenti më pas do të duhet të dorëzojë vetëm dokumentet qoftë me prani fizike apo edhe nëpërmjet postës.

Forma online nuk është obliguar nga epidemia me virusin Kovid-19, pasi kjo traditë aplikohet në UEJL që nga viti 2001, sqaron rektori Abdulmenaf Bexheti.
“Aplikimet janë gjithë online. Kanë qenë dhe vazhdojnë të jenë. Normalisht studentët, më vonë, me postë ose fizikisht i kanë sjellë edhe vetë dokumentet. Por aplikacioni si aplikacion është bërë gjithmonë, nga viti 2001-2002 është bërë online dhe vazhdon të bëhet”, deklaroi Bexheti.

Epidemia ka sjellë vetëm një risi, realizimin e ditëve të hapura. Ndryshe nga vitet tjera kur të njëjtat janë mbajtur në kampusin e universitetit, këtë vit janë mbajtur me takime online ku kanë participuar nxënës duke filluar nga Cërnilishta, Prilepi, Prespa, Zhitosha, Polloge, Shkupi dhe Kumanova, por edhe Kosova dhe me gjerë.
“Ne kemi edhe sistemin e bursave të definuara me kritere të caktuara dhe kushte. Çështja e dytë që ju e përmendet, është shumë e saktë, se pamundësia për t’i bërë ato ditët e hapura, mungesa e aplikantëve në kampus, të ambientohen, të njihen me shërbimet, të njihen me strukturat, me ofertat akademike e kështu me radhë, në pamundësi ta bëjmë në atë format, e kemi bërë në formë online me kontakte nëpër shkolla të mesme”, shtoi Bexheti.

Për shkak të kësaj, Bexheti pret që trendi i rritjes së interesimit të maturantëve për t’u regjistruar në UEJL do të vazhdojë edhe këtë vit.
“Aplikacionet kanë filluar dhe mund të them se është pak trimëruese që krahasimisht me periudhën paraprake, tregon se interesi është në rritje. Në fakt, edhe dy tre vitët e fundit ky trend ka ekzistuar dhe shpresoj se do të jetë edhe më tej. Pas aplikimit normalisht se verifikohen edhe dokumentacionet”, tha Bexheti.

Në studimet deridiplomike nuk ka provim pranues, dhe meqë këtë vit nuk ka maturë shtetërore, nota mesatare do të jetë si pikë referimi për selektim të studentëve gjatë regjistrimit apo edhe fitimit të bursës studimore. Bursa studimore është në dy formate. I pari është 60 për qind nga lirimi i pagesës nëse maturanti ka notë mesatare prej 5.00, ndërkaq 40 për qind lirohet nga participimi nëse maturanti ka notë mesatare prej 4.50 deri në 4.99.

Por provimet pranuese nuk përjashtohen në studimet postdiplomike, ku numri i vendeve është i limituar. Aplikimi është shumë i thjeshtë, duke mbushur formularin në ueb faqen e univeristetit: WWW. SEEU.EDU.MK