Reduktohet numri i pacientëve nga Covid!

Numri i pacientëve të hospitalizuar nga koronavirus është ulur, konsideron drejtoresha e Klinikës për Sëmundje Infektive, Milena Stevanoviq. Sipas saj, në Klinikën për momentin ka 122 pacientë të shtruar, 100 prej të cilëve me pasqyrë më të rëndë klinike. Rreth 12 pacientë janë në ventilim joinvaziv, kurse shumica prej tyre janë kyçur në aparat me përqendrim të lartë të oksigjenit.

“Ky është numri më i ulët. Që moti nuk kemi pasur numër të tillë të pacientëve të shtruar. Shpresoj se kjo tendencë do të vazhdojë edhe më tej”, tha Milena Stevanoviq, drejtoreshë e Klinikës Infektive.

Mjeku Dejan Dokiq njoftoi se në covid-qendrat në klinikat infektive dje në mbrëmje ka pasur vetëm tre pranime dhe nuk ka pasur të vdekur.

-Gjithsej ka 104 shtretër të lirë nga kapaciteti i përgjithshëm me 220 shtretër. Kjo do të thotë se ka 116 të hospitalizuar, asnjë prej tyre nuk ka nevojë nga ventilimi joinvaziv ose respirator”, deklaroi Dejan Dokiq, pulmolog.

Në lidhje me vaksinat Fajzer që duhet të arrijnë, ministri i shëndetësisë, Venko Filipçe tha se nga kompania kanë kërkuar që ende të mos publikohen detaje.

“Nga kompania kërkuan që të mos publikohen dozat, edhe pse e dimë saktë se sa doza do të arrijnë në shkurt, në mars dhe në prill. Javën e kaluar në vazhdimësi kishim disa biseda telefonike, komunikojmë edhe përmes e-mailit me kompaninë Fajzer dhe mendoj se bëhet fjalë për politikë të cilën arritën ta zbatojnë për shkak të rritjes së një pjese të prodhimtarisë së tyre”, pohoi Venko Filipçe, ministër i Shëndetësisë.

Filipçe u shpreh i bindur se vijon periudha e imunizimit të suksesshëm në vend.