Rasti tragjik që ndodhi dje në Karposh ka nxitur reagime të shumta në rrjetet sociale, ndërsa familjarë dhe qytetarë kërkojnë përgjegjësi institucionale. Vëllai i viktimës, Aleksandar Stojanoski, i cili përmes një statusi në Facebook akuzon institucionet për mosveprim, pavarësisht denoncimeve të shumta për dhunë në familje.
“Pas vitesh të tëra raportimesh për dhunë në familje, dhunë fizike dhe psikologjike ndaj të dyve, kërcënime, raportime, tentativë vrasjeje në mes të një institucioni shtetëror, humba mbesën dhe motrën time. Shteti lejoi që jetë të reja të shuheshin, ju lutem mos spekuloni për atë që ndodhi, askush nuk do t’i kthejë të dashurit e mi, por drejtësia do të duhet të ndiqet deri në fund dhe ne nuk do të ndalemi derisa të ndodhë!”, shkroi Aleksandar Stojanoski.
Reagim publik ka bërë edhe fqinja e viktimave Tanja Spirovska, e cila në një postim thekson përgjegjësinë kolektive dhe institucionale për mosparandalimin e tragjedisë.
“150 banesa dështuam t’ju shpëtojmë nga përbindëshi që ju abuzoi dhe ju rrahu çdo ditë.
Ne të gjithë jemi fajtorë në këtë histori, dhe ne dhe të gjitha institucionet gjithashtu!
Fatkeqësisht, keni humbur dy jetë të reja, dhe arsyeja është një dhe ka një emër dhe mbiemër Stojançe Jovanovski. Mos e fajësoni nënën, me sa duket ai ishte rruga e fundit për të dalë nga errësira në të cilën ndodhej ajo”, tha Tanja Spirovska.
Rrjeti Kombëtar Kundër Dhunës ndaj Grave dhe Dhunës në Familje kërkon, siç theksojnë ata, një hetim urgjent, të plotë dhe të pavarur.
RRJETI KOMBËTAR KUNDËR DHUNËS NDAJ GRAVE DHE DHUNËS NË FAMILJE:
“Ajo që po shohim nuk janë incidente të izoluara, ky është një model. Një model parandalimi të pamjaftueshëm, reagimesh të vonuara institucionale, vlerësimi të dobët të rrezikut dhe mbrojtjeje të pamjaftueshme të viktimave. Në vend që sistemi të ofrojë mbrojtje, trajtim dhe sanksionim në kohë të autorëve, po dëshmojmë dështime që ruajnë dhe thellojnë kulturën e pandëshkueshmërisë”
Reaguan edhe nga “Rrjeti Kombëtar Kundër Dhunës ndaj grave” nga ku bëjnë të ditur se vetëm në vitin 2026 katër jetë janë humbur si pasojë e dhunës me bazë gjinore dhe dhunës në familje.
Sipas të dhënave të Eurostat për vitin 2023, Maqedonia e Veriut është ndër vendet me shkallën më të lartë të femicideve në Evropë, gjë që është një tregues alarmues se sistemi i mbrojtjes nuk po funksionon në mënyrë efektive.