Kryeministri i Shqipërisë, Edi Rama ka thënë në një intervistë për “Al-Jazeera” se deklaratat e tij për bashkimin e Shqipërisë me Kosovën janë komentuar jashtë kontekstit. Sipas tij, Shqipëria dhe Kosova janë në një moment historik që duhet shfrytëzuar.
Ai tha se perspektiva e Shqipërisë mbetet integrimi evropian. Megjithatë Rama theksoi se në Ballkan ka një luftë mes së vjetrës dhe së resë.
“Unë mendoj se idetë e mia në lidhje me këtë janë nxjerrë nga konteksti, edhe pse unë jam shprehur qartë dhe në mënyrë të hapur dhe të sinqertë, që do të thotë se për ne shqiptarët është një moment fantastik i historisë tonë. Nuk kemi qenë kurrë më mirë se sot jo vetëm në Shqipëri por edhe në Kosovë dhe më gjerë. Procesin e integrimit duhet ta kuptojmë si një instrument unik për të modernizuar realitetet tona dhe në të njëjtën kohë për të na bashkuar me njëri-tjetrin, në familjen e madhe të bashkuar evropiane”, ka thënë Rama.
Sipas tij, kjo është mënyra se si ne e shohim këtë situatë, por që varet edhe nga Evropa se si ajo e shikon dhe se si e kupton dhe sa ajo ka nevojë për Ballkanin, ashtu sikurse Ballkani ka pasur gjithmonë nevojë për Evropën, por edhe mënyra se si Evropa do të arrijë të ndalojë që strategjitë nacionaliste të prevalojnë mbi ëndrrën e tyre të sinqertë dhe të ligjshme për të qenë pjesë e një familje e madhe, në mënyrë që kjo ëndërr të mos orientohet nga fryma nacionaliste.
“Në fakt kemi të bëjmë me një konflikt mes së vjetrës dhe së resë, dhe beteja nuk ka mbaruar. Ne jemi në anën e së resë, por asnjëherë nuk duhen nënvlerësuar qëndrimet e vjetra, mendimet e së kaluarës sepse Ballkani ka vërtetuar gjithmonë që është vendi ku e vjetra rikthehet”, ka thënë Rama.