Qytetarët në eufori një ditë pas ndeshjes!“Pikërisht kjo na duhej në kohë të pandemisë”

“Gol. Gëzohu Maqedoni. Kampionat Evropian në futboll. Maqedonia shkon në Kampionatin Evropian.” Ky gol i Pandevit me aksion të Elif Elmazit dhe Ilija Nestorovskit, i gëzoi të gjithë qytetarët e Maqedonisë. Një ditë pas ndeshjes, ende mbizotëron euforia. Qytetarët thonë se pas lajmeve të përditshme të këqija lidhur me pandeminë Kovid-19, me këtë fitore, të paktën për një çast e kanë harruar virusin. Vlerësojnë se plasmani në Kampionatin Evropian është një sukses i madh për vendin tonë.

“Gëzim i madh. Gëzohemi. Që moti nuk kemi pasur diçka të tillë që na bashkon. Kjo na duhej, sidomos në këto kohëra”, tha një qytetar.   

“Edhe ne të jemi prezentë pak në Evropë dhe të shohin se Maqedonia di të luajë mirë. Futbollistët tanë, djem të bukur luajnë. Nuk duhet të lëvdohet vetëm Kristijano, le të lëvdohen edhe maqedonasit tanë”, tha një qytetar.  

“Kështu mbrohen ngjyrat e shtetit. Hallall u qoftë. U përgëzoj dhe u uroj suksese edhe më të mëdha në Kampionatin Evropian. Kënaqësi e madhe. Më vjen keq vetëm që sulmi i Elmazit nuk rezultoi me gol”, tha një qytetar.  

“Sukses i madh i përfaqësueses së vendit. Gëzohem shumë. Gjithmonë ndjek futboll dhe jam tepër i kënaqur”, tha një qytetar.  

“Kjo është diçka e bukur, arritje e madhe. Kështu do të tregojmë se kush jemi. Do t’i tregojmë Evropës se Maqedonia ekziston si shtet”, tha një qytetar.  

“Për Maqedoninë është e rëndësishme të paraqitet në Evropë, të shohin se është në Evropë. Nuk është në Afrikë, por në Evropë. Treguan se si luhet, le të mendojnë ata tash”,  tha një qytetar.  

Ende nuk dihet nëse garat do të zhvillohen me publik, prandaj qytetarët janë në dilemë nëse do të mund ta mbështesin përfaqësuesen nga afër. Kampionati Evropian do të luhet vitin e ardhshëm në disa qytete të Evropës. Maqedonia do të luajë në Grupin C, bashkë me Holandën, Austrinë dhe Ukrainën. Nikoqirë të këtyre ndeshjeve do të jenë Bukureshti dhe Amsterdami. Kampionati Evropian fillon më 11 qershor të vitit 2021, kurse ndeshjen e parë Maqedonia do ta luajë kundër Austrisë më 13 qershor.