“Mjaft gënjeshtra dhe padrejtësi, liri për të pafajshmit” – këto ishin pankartat nga tubimi protestues në Koçan. Disa nga të pranishmit theksuan se ka persona në paraburgim që nuk janë përgjegjës të drejtpërdrejtë për tragjedinë dhe kërkuan që ata të lirohen. Në mënyrë të veçantë u kërkua liri për rojet e sigurisë së diskotekës që sipas të pranishmëve shpëtuan jetë. Fajin kryesor ia hedhin pronarit të diskotekës “Puls”.
“Ne vlerësojmë se fajtorët duhet të mbajnë përgjegjësi, nuk jemi këtu që të mos mbajë përgjegjësi asnjëri prej të paraburgosurve. Nëse shikojmë mirë, e dimë se ka edhe fajtorë. Para së gjithash fajtor është pronari i diskotekës”, theksoi një qytetarë.
Koçanasit kërkuan hetim të drejtë dhe për këtë priten tubime të tjera në mbarë vendin.
“Ne nuk mund dhe nuk synojmë të ndalojmë asnjë të drejtë demokratike për tubime paqësore, por gjithashtu ritheksojmë se bëjmë thirrje për arsye, bëjmë thirrje për besim tek institucionet që po i trajtojmë me përkushtim të gjitha situatat”, deklaroi zëdhënësja e Qeverisë, Marija Miteva.
Derisa banorët e Koçanit kërkojnë lirimin e disa prej të arrestuarve, gjykata e qytetit ka miratuar kërkesat e Prokurorisë për të caktuar masën e paraburgimit prej 30 ditësh për të gjithë të dyshuarit. Në mesin e tyre janë ish-ministri Kreshnik Bekteshi, ish-drejtori i Inspektoratit të Tregut Goran Trajkovski dhe ish drejtori i Drejtorisë së Shpëtimit Bekim Maksuti. Në paraburgim janë edhe tre ish-kryetarët e komunës së Koçanit, punonjës të sigurimit, bashkëpronarët e diskotekës, punonjës në disa institucione, si dhe shtatë policë nga Koçani dhe Shtipi.
Gjithsej 34 persona janë të dyshuar, por tre nuk janë në paraburgim për shkak të gjendjes shëndetësore. Të gjithë dyshohen për vepra të rënda kundër sigurisë publike dhe një person i punësuar në Ministrinë e Ekonomisë po hetohet për ryshfet për dhënien e licencës false për funksionimit të klubit. Prokuroria, por edhe policia theksuan se kjo ishte vetëm faza e parë e hetimeve dhe presin që lista e të dyshuarve të zgjerohet.