Qeveria refuzoi propozimin e Komisionit që kufijtë të hapen më 1 qershor?!

I ftuar në emisionin “10minuta” në TV21, Drejtori i Qendrës së Shëndetit Publik në Shkup, Arben Ziberi, zbuloi se në mbledhjen e mëngjesit të sotëm (26.05) të Komisionit për Sëmundje Ngjitëse është rënë dakord se Maqedonia e Veriut është e gatshme që nga 1 qershori të hapë pikëkalimet kufitare.

“Edhe sot në mbledhjen e Komisionit u ra dakord se ne si shtet jemi të gatshëm që nga 1 qershori të bëjmë hapjen e kufijve” pohoi Ziberi.

E edhe përskaj këtij dakordësimi brenda Komisionit, duket që Qeveria nuk e ka miratuar këtë mendim për hapjen e kufijve më 1 qershor. Kjo shihet nga deklarata e Kryeministri teknik, Oliver Spasovski, i cili pas përfundimit të mbledhjes qeveritare, deklaroi se Qeveria vetëm e ka obliguar Komisionin për Sëmundje ngjitëse për të precizuar, edhe përmes protokolleve, çështjen e hapjes së kufijve.

“Në seancën e sotme të Qeverisë e obliguam Komisionin për Sëmundje Ngjitëse në Ministrinë e Shëndetësisë të bëjë vlerësim të qartë dhe preciz për hapjen e kufijve shtetërorë si dhe të përgatisin protokolle të veçanta për hyrje dhe dalje, në dhe nga territori i Maqedonisë së Veriut” deklaroi Spasovski.

Kryeministri teknik nuk përmendi datë. Vetëm tha se në bazë të komunikimit me shtetet fiqnje, shumë shpejt udhëtimet në rajon do të rregullohen në interes të qytetarëve./TV21